محکمہ ماحولیات کے اینٹی سموگ سکواڈز نے 23 صنعتی یونٹ سیل کر دیئے، 8 مقدمات درج، 3 گرفتاریاں

محکمہ ماحولیات پنجاب کے سپیشل اینٹی سموگ سکواڈز نے گزشتہ 24 گھنٹوں کے دوران 51 صنعتی یونٹس کے خلاف کارروائی کرتے ہوئے 23 یونٹس کو سیل کرنے کے علاوہ ماحولیاتی قوانین کی خلاف ورزی پر 8 کے خلاف ایف آئی آر درج اور 3 افراد کو گرفتار کر لیا۔

سکواڈز نے کرول گھاٹی، مومن پورہ، محمود بوٹی، داروغہ والا اور بادامی باغ کے علاقوں میں کارروائیاں کرتے ہوئے ان یونٹوں کو 1.1 ملین روپے کا مجموعی جرمانہ بھی کیا۔

محکمہ ماحولیات کے ترجمان کے مطابق سیل کیے گئے 23 یونٹس میں اسٹیل ملز، فرنس وغیرہ شامل ہیں، ان یونٹس کو پرانے ٹائر، کاربن اور غیر معیاری ایندھن استعمال کرنے یا سموگ کنٹرول کرنے والے اسکربرز کی کمی کی وجہ سے سیل یا جرمانہ کیا گیا۔

ترجمان نے مزید کہا کہ ان سکواڈز نے گزشتہ ایک ماہ کے دوران لاہور میں اب تک 1685 صنعتی یونٹس کا معائنہ کیا جن میں سے 385 یونٹس کو متعدد خلاف ورزیوں پر سیل کر دیا گیا جبکہ 476 یونٹس کو نوٹسز جاری کیے گئے اور 72.2 ملین روپے کا اجتماعی جرمانہ بھی عائد کیا گیا۔

ڈائریکٹر جنرل محکمہ ماحولیات پنجاب ظہیر عباس نے کہا کہ فضائی آلودگی پھیلانے والے صنعتی یونٹس کے خلاف زیرو ٹالرنس کی پالیسی اپنائی گئی ہے۔ انہوں نے کہا کہ سموگ کنٹرول سسٹم نصب کیے بغیر کسی یونٹ کو کام کرنے کی اجازت نہیں دی جائے گی۔

محکمے نے سیل شدہ یونٹوں کے مالکان کو بھی خبردار کیا تھا کہ مقدمات کے اندراج کے علاوہ غیر قانونی طور پر سیل توڑنے میں ملوث پائے جانے والوں کے خلاف گرفتاریاں عمل میں لائی جائیں گی۔