آرمینیا اور روس نگورنو کاراباخ جنگ بندی معاہدے پر عمل نہیں کر رہے، آذربائیجان

آذربائیجان نے کہا ہے کہ روس اور آرمینیا نگورنر کاراباخ جنگ بندی معاہدے پر عمل نہیں کر رہے، دوسری طرف یورپی یونین نے آذر بائیجان اور آرمینیا پر زور دیا ہے کہ وہ ’ متشدد اور تلخ بیانئیے ‘ سے گریز کریں۔

سوویت یونین ٹوٹنے کے بعد آذر بائیجان اور آرمینیا  ایک چھوٹے پہاڑی علاقے نگورنو کاراباخ پر دو جنگیں لڑ چکے ہیں، یہ علاقہ آذربائیجان کا حصہ ہے لیکن یہاں ایک لاکھ 20 ہزار آرمینیائی نسل کے لوگ بستے ہیں۔

آذربائیجان نے 2020 میں ایک زبردست جنگ کے بعد نگورنو کاراباخ کے گرد اور اس علاقے کے اندر چند حصوں پر کنٹرول واپس لیا تھا اور روس نے دونوں ملکوں کے درمیان جنگ بندی معاہدہ کرایا تھا۔

آذربائیجان کی وزارت خارجہ نے ایک بیان میں کہا کہ آرمینیا نے جنگ بندی معاہدے کی کئی شقوں پر عمل نہیں کیا اور روس نے اس معاہدے پر عمل درآمد کے لیے اپنی ذمہ داریاں پوری نہیں کیں۔

آذربائیجان اور آرمینیا اس جنگ بندی معاہدے کے بعد سے امن معاہدے کی کوششیں کر رہے ہیں اور روس اس معاہدے میں قائدانہ کردار کی کوشش میں ہے، اس معاہے کے نتیجے میں دونوں ملک سرحدوں کا مستقل تعین اور نگورنو کاراباخ کا حل چاہتے ہیں، جس کے بعد دونوں کے تعلقات بحال ہو سکیں۔