رؤف حسن پر حملہ پارٹی کے لیے پیغام ہے لیکن ہم ڈرنے والے نہیں، شیر افضل مروت

شیر افضل مروت نے کہا ہے کہ رؤف حسن کےساتھ جو سلوک کیا گیا وہ پارٹی کےلئے ایک پیغام ہے، ہمیں ڈرانے کی کوشش کی جارہی ہے لیکن پی ٹی آئی کی قیادت ڈرنے والی نہیں۔

پشاور ہائیکورٹ میں میڈیا سے بات کرتے ہوئے شیر افضل مروت نے کہا کہ صوبے میں بیوروکریسی وہی ہے ،کوئی تبدیلی نہیں ہوئی،وفاقی حکومت بیوروکریسی میں رکاوٹیں ڈال رہی ہے،صوبائی حکومت نے بشکیک سے طلبہ کے لیے خصوصی طیارہ بجھوا کربردست کام کیا، وفاقی حکومت صوبے کی رائلٹی میں سیاست اور تعصب کا مظاہرہ کر رہی ہے۔

شیر افضل مروت نے کہا کہ مجھے کمیٹیوں سے نکالا گیا لیکن میں پی ٹی آئی میں ہوں، نہ میں پارٹی میں سازشیں کرتا ہوں اور نہ گروپ بندی ، خان جو کہتا ہے وہی کرونگا،میری خدمات پارٹی کےلئے رضاکارانہ ہیں، میں کسی سے معاوضہ نہیں لیتا، بانی چیئرمین نے کہا تھا کہ پارٹی اختلافات پر بات نہ کریں میں نے باتیں کیں تو وہ ناراض ہوگئے۔

شیر افضل مروت نے کہا کہ بانی چیئرمین کے ناراض ہونے پر میں نے بیان بازی سے اجتناب کا اعلان کیا،میں کسی کے ساتھ اختلاف نہیں رکھتا لوگ مجھے نہیں چھوڑتے،بانی چیئرمین سے ملاقات ہوگی تو تمام چیزیں کلیئر ہو جائینگی۔

شیر افضل مروت نے کہا کہ بانی چیئرمین کے دو کیسز رہتے ہیں ،ایک سائفر اور دوسرا عدت کیس ،اب دیکھنا ہے کہ رہائی کب ہوگی، القادر ٹرسٹ میں بانی چیئرمین کو سزا ہوتی ہے، تو یہ سیاسی انتقام ہوگا، یہ اسی طرح کیسز بناتے رہیں گے اور سزائیں دیتے رہیں،پھر اس کا حل احتجاج ہوگا۔