خیبرپختونخوا میں کل سے بارشوں کا امکان، پی ڈی ایم نے حساس اضلاع کے لیے الرٹ جاری کردیا

محکمہ موسمیات نے خیبرپختونخوا میں 27 جنوری سے بارشوں اور بالائی اضلاع میں برفباری کاسلسلہ شروع ہونےکا امکان ظاہر کیا ہے، صوبائی ڈیزاسٹر مینجمنٹ اتھارٹی (پی ڈی ایم اے) نے تمام ضلعی انتظامیہ کو الرٹ رہنے کے لیے مراسلہ جاری کردیا۔

ڈائریکٹر جنرل پی ڈی ایم اے محمد قیصر خان نے بارشوں اور برفباری کے پیش نظر ضلعی انتظامیہ کو پیشگی اقدامات اٹھانے کی ہدایت کی ہے اور کہا ہے کہ ضلعی انتظامیہ چھوٹی ، بھاری مشینری کی دستیابی یقینی بنائے۔

 پی ڈی ایم اے کے مراسلہ میں کہا گیا کہ شہری علاقوں میں دھند میں کمی کا امکان ہے۔

پی ڈی ایم اے نے حساس بالائی علاقوں میں سیاحوں اور مقامی آبادی کو موسمی حالات سے باخبر رہنے اور  احتیاتی تدابیر کی ہدایت کی ہے اور کہا ہے کہ حساس اضلاع میں ضلعی انتظامیہ کو مقامی آبادی  تک پیغامات مقامی زبانوں میں پہنچائے جائیں،کسی بھی ہنگامی صورتحال میں تمام متعلقہ ادارے روڈ لنکس کی بحالی میں چوکس رہیں۔

مراسلہ میں کہا گیا کہ حساس علاقوں میں صوبائی اور قومی شاہراہوں پرمسافروں کو پیشگی خبردار کیا جائے۔  اس دوران ہنگامی خدمات کے اہلکاروں کی دستیابی یقینی بنائیں۔۔سیاحوں کو موسمی صورت حال سے آگاہ کیاجائے۔

بارشوں اور برفباری کا سلسلہ31 جنوری تک وقفے وقفے سے جاری رہنے کا امکان ہے۔