سائفر کیس، عمران خان اور شاہ محمود کے خاندانوں کو مقدمہ کی سماعت دیکھنے کی اجازت

سائفر کیس کی سماعت بنا کسی گواہ کا بیان ریکارڈ ہوئے 14 نومبر تک ملتوی کردی گئی۔ عدالت نے بڑا فیصلہ لیتے ہوئے دونوں ملزمان کی فیملیز کے پانچ پانچ ممبران کو سماعت سننے کی اجازت جبکہ چیئرمین پی ٹی آئی سے ان کے بچوں کا ہفتہ میں ایک دن فون پر بات کرانے کا بھی حکم دیدیا۔

خصوصی عدالت کے جج ابو الحسنات ذوالقرنین نے سائفر کیس کی سماعت ملزمان کے وکیل سلمان صفدر کے عدالت میں پیش نہ ہونے کے باعث 14 نومبر تک ملتوی کردی۔ آج کی سماعت کیلئے ایف آئی اے 3 گواہ بیان ریکارڈ کرانے کیلئے ہمراہ لائی تھی۔

ملزمان چیئرمین پی ٹی آئی اور شاہ محمود قریشی بھی کمرہ عدالت موجود تھے۔ آج کی سماعت میں بڑا فیصلہ لیتے ہوئے عدالت نے دونوں ملزمان کی فیملیز کے پانچ پانچ ممبران کو سماعت سننے کی اجازت دیدی۔

شاہ محمود قریشی کی اہلیہ اور بیٹی نے آج پہلی بار جیل میں عدالت کی کاروائی کو براہ راست دیکھا جبکہ چیئرمین پی ٹی آئی کی ان کے بیٹوں سے ملاقات بابت عدالت نے سپرنٹینڈنٹ جیل کو بلا کر حکم جاری کیا کہ ہفتہ میں ایک دن چیئرمین پی ٹی آئی سے ان کے بچوں کی فون پر بات کرائی جائے۔

آئندہ سماعت پر استغاثہ کے مزید 3 گواہان کو بھی بیانات ریکارڈ کرانے کیلئے طلب کرلیا گیا مجموعی طور پر 6 گواہان کے بیانات کو ریکارڈ کیا جائیگا۔