سائفر کیس کا فیصلہ قومی رازوں سے کھیلنے کا لائسنس ہے، شرجیل میمن

وزیراطلاعات سندھ شرجیل میمن نے کہا ہے کہ پی ٹی آئی کی جانب سے انتشار کابیانیہ ذہنوں میں ٹھونسا جارہا ہے،بانی پی ٹی آئی کا شیخ مجیب والا بیانیہ واضح کرتا ہے وہ ملک توڑنا چاہتے ہیں۔

شرجیل میمن نے ایک بیان میں کہا کہ پی ٹی آئی کبھی دارالخلافہ پر چڑھائی کی دھمکی تو کبھی ملک توڑنے کی بات کرتی ہے،اقتدار نہ ملنے پر شیخ مجیب کو ہیرو قرار دینا پاکستان کے تاریخی قومی بیانئے سے انحراف ہے۔

شرجیل میمن نے کہا کہ سانحہ مشرقی پاکستان کو خنجر بنا کر ریاست کی شہ رگ پر رکھنا سنگین عمل ہے،عمران خان کا شیخ مجیب کو ہیرو قرار دینا،عارف علوی کی توثیق قوم کے پرانے زخموں پر نمک پاشی کے مترادف ہے۔

وزیر اطلاعات سندھ نے کہا کہ پی ٹی آئی نے اداروں کیخلاف ڈیجیٹل دہشتگردی کا مظاہرہ کیا، گھٹیا الزامات لگائے،قومی اداروں کیخلاف مسلسل مذموم مہم چلائی گئی، دباؤ ڈالنے کیلئے معزز جج صاحبان کو ٹاؤٹ کہا گیا۔

شرجیل میمن نے کہا کہ سائفر کیس کا فیصلہ قومی رازوں اور مفادات سے کھیلنے کا لائسنس دینے کے مترادف ہے،ایک شخص جلسوں میں لہرا لہرا کر سائفر دکھاتا ہے،آڈیو آتی ہے ہمیں اس پر کھیلنا ہے لیکن پھر اسے ریلیف دیا جاتا ہے،ایسا کیوں ہے؟