کمشنر راولپنڈی کے الزامات چیف جسٹس کے عہدے کو بے توقیر کرنے کی کوشش ہے، الیکشن کمیشن انکوائری کرے، سپریم کورٹ بار

سپریم کورٹ بار ایسوسی ایشن نے کمشنر راولپنڈی کے الزامات پر شدید تحفظات کا اظہار کر دیا۔

سپریم کورٹ بار ایسوسی ایشن کی جانب سے جاری کئے گئے اعلامیہ میں کہا گیا کہ سپریم کورٹ بار کو کمشنر راولپنڈی کے دھاندلی می چیف جسٹس پاکستان کے ملوث ہونے بارے بیان پر شدید تحفظات ہیں۔

اعلامیہ میں کہاگیا ہے کہ کمشنر راولپنڈی کا بیان بدنیتی پر مبنی اور چیف جسٹس پاکستان کے عہدے کو بے توقیر کرنے کی کوشش ہے،  چیف جسٹس پاکستان یا سپریم کورٹ کا انتخابات میں دھاندلی سے متعلق کوئی کردار نہیں ہے، انتخابی عمل الیکشن کمیشن کا انتظامی معاملہ ہے۔

سپریم کورٹ بار ایسوسی ایشن نے مطالبہ کیا کہ الیکشن کمیشن کمشنر راولپنڈی کے دھاندلی سے متعلق الزامات کی انکوائری کرے۔