سی پی او راولپنڈی، ڈی پی او اٹک اور سپرنٹنڈنٹ اٹک جیل کو توہین عدالت کا نوٹس

لاہور ہائیکورٹ نے تحریک انصاف کے صدر چوہدری پرویز الہی کو بدھ کے دن عدالت میں پیش کرنے کا حکم دیتے ہوئے سی پی او راولپنڈی، ڈی پی او اٹک اور سپرٹنڈنٹ جیل اٹک کو توہین عدالت کا شوکاز نوٹس جاری کر دیا۔

جسٹس مرزا وقاص رؤف نے پرویز الہی کی اہلیہ قیصرہ الہیٰ کی درخواست پر سماعت کی تو سرکاری وکیل نے کہا کہ سنگل بینچ نے پرویز الٰہی کو کسی بھی مقدمے میں گرفتار کرنے سے روکا تھا لیکن ’پرویز الٰہی کو پنجاب پولیس نے نہیں اسلام آباد پولیس نے گرفتار کیا۔‘

جسٹس مرزا وقاص رؤف نے سوال کیا کہ پرویز الہی کہاں ہیں۔ اس پر سرکاری وکیل نے کہا کہ پرویز الٰہی کو طبیعت کی ناسازی کے باعث پمز منتقل کیا گیا تھا جس کے بعد ان کو اسلام آباد پولیس لائنز منتقل کر دیا گیا۔

عدالت نے اٹارنی جنرل آفس سے وفاقی حکومت کے نمائندے کو بھی طلب کر لیا اور بعد میں حکم دیا کہ چوہدری پرویز الہی کو بدھ کے دن عدالت میں پیش کیا جائے۔

عدالت نے سی پی او راولپنڈی، ڈی پی او اٹک اور سپرٹنڈنٹ جیل اٹک کو توہین عدالت کا شوکاز نوٹس بھی جاری کر دیا۔