عدالت کسی بھی کیس میں گرفتاری سے روکنے کا حکم دے، بشریٰ بی بی کی لاہور ہائیکورٹ میں درخواست

عمران خان کی اہلیہ بشریٰ بی بی نے مقدمات، انکوائریوں کی تفصیلات کے حصول کیلئے ہائیکورٹ سے رجوع کرلیا

سابق وزیراعظم کی اہلیہ بشری بی بی نے لاہور ہائیکورٹ میں درخواست دائر کی ہے،درخواست میں حکومت پاکستان سمیت دیگر کو فریق بنایا گیا ہے۔

درخواست میں موقف اختیار کیا گیا ہے کہ درخواست گزار کے خاوند عمران خان جیل میں قید ہیں،درخواست گزار کیخلاف ملک بھر میں کیسز درج ہیں۔

درخواست میں مزید کہا گیا کہ درخواست گزار کیخلاف مختلف حکام کی جانب سے نظربندی کے احکامات جاری کیے گئے،نیب، ایف آئی اے، انٹی کرپشن اور پولیس میں ایف آئی آرز، انکوائرئیز زیر التوا ہیں۔

درخواست میں استدعا کی گئی کہ عدالت تمام معلوم اور نامعلوم کیسز کی تفصیلات فراہم کرنے کا حکم دے،عدالت تمام کیسز میں درخواست گزار کی حفاظتی ضمانت منظور کرے۔

یہ بھی درخواست کی گئی ہے کہ عدالت درخواست گزار کو کسی بھی کیس میں گرفتاری سے روکنے کا حکم دے۔