عید قربان، کراچی ایئرپورٹ کے اطراف صفائی کے لیے آگاہی مہم

جناح انٹرنیشنل ائیرپورٹ انتظامیہ نے کراچی کے بین الاقوامی ہوائی اڈے کے اطراف پرندوں کے مسافربردارطیاروں سے تصادم کے حوالے سے آگاہی مہم شروع کردی،قرب وجوار کے مارکیٹوں میں پمفلیٹس تقیسم کیے گئے۔

جناح انٹرنیشنل انتظامیہ کی جانب سے ہوائی اڈے کے اطراف کے علاقوں میں پرندوں کے خطرے سے متعلق آگاہی مہم کا انعقاد کیا گیا۔ترجمان سی اے اے کے مطابق مہم کا بنیادی مقصد عید الاضحی کے دوران قربانی کی باقیات کو ٹھیک سے ٹھکانے لگانے کی ترغیب دینا ہے۔

اس بات کی عوام میں بیداری پیدا کی جارہی ہے کہ پرندوں کا جہازوں سے ٹکران بڑے حادثے کا سبب بن سکتا ہے، مہم کے دوران کراچی ائرپورٹ کے اطراف کے علاقوں میں عوام میں معلوماتی پمفلٹ تقسیم کیے گئے، چیدہ چیدہ مقامات پر بینرز لگائے گئے اور مقامی آبادی میں ڈسپوزل بیگز بھی تقسیم کئے گئے۔

مہم کے دوران دکانداروں،فوڈ آؤٹ لیٹ مالکان اور ہوٹل مالکان کو کھانے پینے کی اشیاء کو ٹھیک طریقے سے ٹھکانے لگانے کی اہمیت سے آگاہ کیا گیا،ائیرپورٹ انتظامیہ نے مقامی حکام، کمیونٹی معززین اور مذہبی رہنماؤں کے ساتھ ملاقاتیں بھی کیں۔

ملاقاتوں میں ہوائی اڈے کی انتظامیہ نے قربانی کی باقیات کو ٹھیک سے ٹھکانے لگانے کی اہمیت اور محفوظ ہوائی سفر کے ربط کو اجاگر کیا۔

ترجمان سی اے اے کے مطابق جہازوں کو پرندوں کے حوالے سے لاحق خطرات سے متعلق آگاہی مہم کو کمیونٹی کی طرف سے زبردست مثبت ردعمل ملا، لوگوں نے جناح انٹرنیشنل انتظامیہ کی پرندوں کے خطرے سے نمٹنے اور فلائٹ آپریشن کو محفوظ بنانے کی کوششوں کی تعریف کی۔