بجلی فی یونٹ 1 روپے 15 پیسے مہنگی، صارفین پر 22 ارب 29 کروڑ کا مزید بوجھ

نیپرا نے ملک کے تمام بجلی صارفین پر 22 ارب 29 کروڑ روپے کا اضافی بوجھ ڈال دیا ہے جس کا اطلاق کے الیکٹرک سمیت تمام صارفین پر ہو گا۔

نیپرا نے عوام پر ایک اور بجلی بم گرادیا، اور ڈسکوز کے لیے بجلی کی فی یونٹ قیمت میں 1 روپے 15پیسے اضافے کی منظوری دے دی ہے۔

نیپرا اتھارٹی نے بجلی مہنگی کرنے کے حوالے سے باضابطہ نوٹیفکیشن بھی جاری کر دیا ہے، اور حتمی منظوری کیلئے نوٹی فکیشن حکومت کو بھجوا دیا ہے، حکومتی منظوری کے بعد بجلی کی قیمتوں میں اضافے کا اطلاق ہو گا۔

نوٹیفکیشن کے مطابق بجلی کی قیمتوں میں اضافہ سہ ماہی ایڈجسمنٹ کی مد میں کیا گیا ہے، اور اس کا اطلاق یکم جنوری 2024سے ہو گا جو تین ماہ مارچ 2024 تک لاگو رہے گا۔

قیمتوں میں اضافے سے صارفین پر 22 ارب 29 کروڑ روپے کا اضافی بوجھ پڑے گا، اور اس کا اطلاق کے الیکٹرک سمیت تمام صارفین پر ہو گا۔