چیف الیکشن کمشنر کو بھی نہیں معلوم الیکشن کب ہوں گے، بلاول بھٹو زرداری

چیئرمین پیپلز پارٹی بلاول بھٹو نے کہا ہے کہ چیف الیکشن کمشنر سمیت کسی کو کوئی نہیں پتا کہ پاکستان میں آئندہ عام انتخابات کب ہوں گے۔

مظفر گڑھ میں ایک تقریب سے خطاب کے بعد صحافیوں کی جانب سے مُلک میں آئندہ عام انتخابات سے متعلق پوچھے گئے ایک سوال کے جواب میں بلاول بھٹوط نے کہا کہ ابھی تو کسی کو نہیں پتا کہ پاکستان میں آئندہ عام انتخابات کب ہوں گے، حتی کہ چیف الیکشن کمشنر بھی نہیں جانتے کے الیکشن کب ہوں گے۔

 بلاول بھٹو نے مسلم لیگ ن کا نام لیے بغیر کہا کہ ایک جماعت تنہا ہی یہ فیصلہ کر رہی ہے کہ مُلک میں انتخابات کب ہوں گے۔مجھے نہیں پتہ کہ الیکشن کب ہوں گے، آپ کو نہیں پتہ کہ الیکشن کب ہوں گے مگر ایک سیاسی جماعت کو پہلے سے پتا ہے کہ الیکشن کب ہوں گے اور اُن کے جانب سے خود ساختہ طور پر الیکشن کی تاریخ کا اعلان بھی کیا جاتا ہے، جو مناسب نہیں ہے۔

بلاول بھٹو نے کہا کہ اگر 90 دن میں الیکشن نہیں ہونے تو کتنے دن میں الیکشن ہوں گے، الیکشن کمیشن تاریخ تو دے۔

بلاول بھٹو نے کہا کہ نو مئی کے واقعات کی ذمہ دار سیاسی جماعت کو کبھی بھی الیکشن میں کامیاب نہیں ہونے دیا جائے گا۔

بلاول بھٹو نے کہا کہ پاکستان کو مسائل سے نکالنے کے لیے تمام سیاسی جماعتوں کو ساتھ بیٹھنا ہو گا، کسی بھی سیاسی جماعت کے لیے تنہا یہ مُمکن نہیں ہے کہ وہ پاکستان کو درپیش حالیہ مسائل کا حل تلاش کر سکے، اور ایسے میں یہ بہت ضروری ہے کہ تمام فریقین کور اعتماد میں لیا جائے۔

ایک سوال کے جواب میں بلاول بھٹو نے کہا کہ ہم نے تو چاہا تھا کہ میثاق جمہوریت ٹو بھی ہو، ہم نے نئے میثاق جمہوریت کی کوشش کی مگر وہ نہیں ہو سکا، ہماری کوشش اور دیگر سیاسی جماعتیوں کے ساتھ رابطوں کے باوجود پی ڈی ایم میثاق جمہوریت کے حق میں نہیں تھی۔