فتوے دینے والے کسی غلط فہمی میں نہ رہیں، آہنی ہاتھوں سے نمٹا جائے گا، وفاقی وزیر اطلاعات

وفاقی وزیر اطلاعات عطا تارڑ نے کہا ہے کہ قتل کے فتوے جاری کرنے والے کسی غلط فہمی میں نہ رہیں، کل دیا گیا فتویٰ سیاسی بنیادوں پر جاری کیا گیا، یہ کام اب مذمتوں سے آگے چلا گیا ہے آہنی ہاتھوں سے نمٹیں گے، چیف جسٹس آف پاکستان کے والد قائد اعظم کے ساتھی تھے اور ان کا ایک اہم کردار تھا۔

راولپنڈی میں علماء کرام اور مقامی ایم این اے حنیف عباسی کے ہمراہ میڈیا سے گفتگو کرتے ہوئے وفاقی وزیر عطا تارڑ کا مزید کہنا تھا کہ فتوے دینے والے کیا دین اسلام کو سمجھتے بھی ہیں؟ آپ کو کس نے اختیار دیا کہ سر قلم کرنے اور کچھ سمجھ بھی ہے انہیں؟سپریم کورٹ کی پریس ریلیز اور بیانات آئے ہیں اس کے بعد بھی اس طرح کے بے بنیاد فتوے دیئے گئے۔ اب آہنی ہاتھوں سے ان کے راستے کو روکیں گے جو نفرت پھیلاتے ہیں۔

عطا تارڑ نے کہا کہ اس فتوے کے مقاصد صرف اور صرف سیاسی ہیں، قاضی فائز عیسیٰ کا خاندان پاکستان بنانے میں شامل تھا، کوئی بھی قانون کو اپنے ہاتھ میں نہیں لے سکتا، اس پر اتفاق ہوا ہے۔ کیا دین اسلام کے صرف آپ ہی علمبردار ہیں ؟ سخت ترین الفاظ میں مذمت کرتے ہیں اور حکومت اس کی پیروی کرے گی۔

حنیف عباسی نے میڈیا سے گفتگو میں کہا کہ یہاں کا بچہ بچہ حرمت رسول پہ کٹ مرنے کو تیار ہوتا ہے،اس ملک میں انار کی پھیلانے کی اجازت کسی کو نہیں دی جا سکتی، ہم نے بہت سی حکومتوں کو گرانے کیلئے لوگوں کو استعمال کیا اب ایسے لوگوں کو گرفتار کیا جائے۔ یہاں تمام علماء نے اس معاملے پہ متفقہ رائے دے دی ہے لہذا ایسے فتووں کی ریاست کے اندر کوئی گنجائش نہیں۔