ایف آئی اے انٹرپول پاکستان نے قتل، ڈکیتی کے 6 ملزم عرب امارات سے گرفتار کر کے پولیس کے حوالے کر دیئے

ایف آئی اے نیشنل سینٹرل بیورو انٹرپول پاکستان نے پنجاب پولیس کو مطلوب 6 ملزمان کو گرفتار کر لیا۔

ایف آئی اے انٹرپول پاکستان کی جانب سے  بڑی کارروائی عمل میں لائی گئی ہے،جس میں ایف آئی اے نیشنل سینٹرل بیورو انٹرپول پاکستان نے پنجاب پولیس کو مطلوب 6 ملزمان کو گرفتار کرلیا۔

ملزمان کو یو اے ای سے گرفتار کر کے سیالکوٹ ائیرپورٹ منتقل کر دیا گیا،ترجمان ایف آئی اے کے مطابق گرفتار ملزمان میں قمر شہزاد، توقیر بٹ،  بوستان حسن، صائم زیب, وقار عظیم اور نسیم عباس شامل ہیں۔

ملزمان کے خلاف قتل، ڈکیتی کی دفعات کے تحت مقدمات درج تھے،گرفتار ملزمان اٹک، وہاڑی، گجرانوالہ، پاکپتن اور ٹوبہ ٹیکسنگ پولیس کو مطلوب تھے،ایف آئی اے NCB انٹرپول پاکستان نے ملزمان کی گرفتاری کے لئے ریڈ نوٹس جاری کئے تھے،بعد ازاں ایف آئی اے امیگریشن نے ملزمان کو متعلقہ پولیس کے حوالے کر دیا۔

ملزمان کی حوالگی انٹرپول اسلام آباد کی انٹرپول یو اے ای کے ساتھ قریبی رابطہ کاری کی وجہ سے ممکن ہوئی،این سی بی انٹرپول پاکستان نے گزشتہ سال ملزمان کی گرفتاری کے لئے 117 ریڈ نوٹسسز بھی جاری کئے، انتہائی مطلوب ملزمان کی گرفتاری کے لئے این سی بی انٹرپول پاکستان 24/7 خدمات سرانجام دے رہا ہے۔