عمران خان کے ایکس اکاؤنٹ سے متنازع پوسٹ پر پی ٹی آئی کے تین لیڈروں کی ایف آئی اے طلبی

عمران خان کے سوشل میڈیا اکاؤنٹ سے سقوط ڈھاکہ اور شیخ مجیب الرحمان کے متعلق ویڈیو اپلوڈ کرنے کے معاملے میں ایف آئی اے نے مزید تین پی ٹی آئی لیڈرز کو نوٹسز جاری کر دیے ہیں، تینوں کو ایف آئی اے نے کل 11 بجے انکوائری کےلئے بلایا گیا ہے، جن پی ٹی آئی لیڈرز کو نوٹس دیے گئے ہیں اُن میں عمر ایوب، بیرسٹر گوہر خان اور رؤف حسن شامل ہیں۔

ایف آئی اے نے نوٹس عمران خان کے آفیشل ایکس اکاؤنٹ کے غیر قانونی استعمال پر کی جانے والی انکوائری پر جاری کئے، نوٹس کے متن میں کہا گیا کہ عمران خان کے آفیشل اکاؤنٹ سے ریاست اور ریاستی اداروں کے خلاف عوام کو اشتعال دلانے کی کوشش کی گئی۔

نوٹس میں کہا گیا کہ اس سے عوام میں خوف اور بے چینی پھیلنے کا خدشہ ہے،اس اشتعال انگیزی سے عوام کو ریاست اَور اداروں کے خلاف قانون ہاتھ میں لینے پر بھی اکسایا جا سکتا ہے۔