اٹک میں سکول وین پر فائرنگ، 2 بچے ہلاک، 5 زخمی

ماڈل پولیس اسٹیشن صدر اٹک کی حدود میں کالا چٹا پہاڑ کے دامن میں واقع گاؤں ڈھیری کوٹ کے علاقے میں نامعلوم افراد نے سکول وین پر فائرنگ کی،ابتدائی معلومات کے مطابق 2 بچے جاں بحق، 5 بچے زخمی  ہوگئے۔ سکول وین کا ڈرائیور بھی زخمی ہے۔

ریسکیو 1122 کی ٹیمیں زخمی بچوں اور لاشوں کو ڈسٹرکٹ ہیڈ کوارٹر ہسپتال اٹک منتقل کر رہی ہیں، تمام بچے 10 سے 12 سال کی عمر کے ہیں، نامعلوم افراد موقع سے فرار ہوگئے۔

ڈی پی او اٹک نے فوری طور پر پولیس ٹیمیں تشکیل دے دیں ۔ پولیس نے تمام علاقہ کی ناکہ بندی کر کے سرچ آپریشن شروع کردیا۔

وزیراعلیٰ پنجاب مریم نواز نے اٹک میں اسکول وین پر فائرنگ سے 2 بچوں کے جاں بحق ہونےکے واقعہ کا نوٹس لے لیا۔وزیراعلیٰ پنجاب نے اسکول وین پر فائرنگ کے واقعہ کی کمشنرراولپنڈی سے رپورٹ طلب کرلی۔

وزیراعلیٰ پنجاب نے فائرنگ سے 2 بچوں کے جاں بحق ہونے پر گہرے دکھ کا اظہار کیا،وزیراعلیٰ نے کی زخمیوں کو علاج کی بہترین سہولتیں فراہم کرنے کی بھی ہدایت کی۔