حزب اللہ کے راکٹ حملوں سے شمالی اسرائیل کے بڑے حصے میں جنگل میں آگ پھیل گئی

لبنان کے عسکریت پسند گروپ حزب اللہ کی طرف سے داغے گئے راکٹوں کی وجہ سے لگی جنگلی آگ نے شمالی اسرائیل کے بڑے حصے کو لپیٹ میں لے لیا، امدادی ٹیمیں آگ پر قابو پانے کے لیے جدوجہد کر رہی ہیں۔
لبنان کی سرحد کے قریب واقع شہروں میں رہنے والے بہت سے اسرائیلیوں کو اسرائیل اور حزب اللہ کے درمیان بڑھتی ہوئی لڑائی کے پیش نظر مہینوں پہلے علاقے سے نکال لیا گیا تھا۔ مقامی میڈیا کے مطابق، کچھ گھروں میں آگ لگ گئی۔
اسرائیلی فوج نے آگ پر قابو پانے کے لیے سامان اور فوجی بھیجے، آگ گرم اور خشک موسم کی وجہ سے تیزی سے پھیل گئی اور چھ فوجی ریزروسٹ معمولی زخمی ہوئے۔
فوج نے کہا کہ "فورسز نے آگ لگنے والے مقامات پر کنٹرول حاصل کر لیا، اور اس مرحلے پر کسی انسانی جان کو خطرہ نہیں ہے”۔
اسرائیل کی پارکس اتھارٹی نے پیر کے روز کہا تھا کہ آگ نے پہلے ہی سینکڑوں ایکڑ کو لپیٹ میں لے لیا ہے۔ نیشنل فائر سروس نے کہا کہ اس کے فائر فائٹرز رات گئے تک کئی جگہوں پر کام کر رہے تھے، بشمول کریات شمونہ کے قصبے میں، جہاں وہ گھروں کی ایک قطار کو بچانے کی کوشش کر رہے تھے۔
پولیس نے کہا کہ انہوں نے سڑکیں بند کر دیں اور علاقے میں اب بھی موجود رہائشیوں سے کہہ رہے ہیں کہ وہ وہاں سے نکل جائیں۔