تمام محکموں، کارپوریشنز، بینکوں میں اولین ترجیح کے طور ہاکی ٹیموں کو بحال کیا جائے،ایم کیو ایم لیڈر کا وزیراعظم سے مطالبہ

ایم کیو ایم پاکستان کے رکن قومی اسمبلی خواجہ اظہار الحسن نے وزیر اعظم کو خط  لکھ کر قومی کھیل ہاکی کو تمام محکموں، کارپوریشنوں، بینکوں، خود مختار اداروں وغیرہ میں اولین ترجیح پر فوری طور پر نافذ کرنے کا مطالبہ کردیا۔

خواجہ اظہار الحسن نے کہا وزیر اعظم سے محکمانہ کھیلوں کی بحالی کے اپنے احکامات پر عملدرآمد بھی کروائیں، بحیثیت وزیر اعظم آپ نے ملک بھر میں 30 مختلف محکمانہ میں کھیلوں کو بحال کرنے کی ہدایت کی ہے جو خوش آئند ہے۔

خواجہ اظہارالحسن نے لکھا کہ یہ انٹر ڈیپارٹمنٹس کھیل دو سال قبل بند کر دیئے گئے تھے،پچھلی حکومت کی اس پابندی سے بے روزگاری اور کھیلوں کی تنزلی ہوئی تھی،اس اقدام سے پورے پاکستان میں کھیلوں کے شائقین کی حوصلہ شکنی ہوئی تھی۔

خواجہ اظہار الحسن نے لکھا کہ آپ کے حالیہ احکامات نوجوانوں کے لیے متاثر کن اور خوش آئند ہیں،کھیلوں کے تقریباً 30 مختلف شعبوں میں ہزاروں کھلاڑی اس پر عمل درآمد کا انتظار کر رہے ہیں،وزیراعظم کی ہدایات پر بدقسمتی سے آج تک ان احکامات پر عمل درآمد نہیں ہوا۔

خواجہ اظہار الحسن نے مطالبہ کیا کہ قومی کھیل ہاکی اور محکمانہ کھیلوں میں ترجیح دی جانی چاہیے،اس اقدام سے خاص طور پر اچھے ایتھلیٹس جو اعلیٰ سطح تک پہنچنے میں ناکام رہے انہیں فائدہ پہنچے گا۔