کتنے ظالم لوگ ہیں کتوں کو بھی مارتے ہیں، چیف جسٹس سندھ ہائیکورٹ

سندھ ہائیکورٹ نے ڈیفنس اور کلفٹن کے علاقوں میں آوارہ کتوں کی بھرمار سے متعلق کنٹونمنٹ بورڈ کی جانب سے کارروائی نہ کرنے کیخلاف درخواست پر کنٹونمنٹ بورڈ و دیگر سے جواب طلب کرلیا۔

ہائیکورٹ میں ڈیفنس اور کلفٹن کے علاقوں میں بھی آوارہ کتوں کی بھرمار سے متعلق کنٹونمنٹ بورڈ کلفٹن کی جانب سے کارروائی نہ کرنے کیخلاف خاتون سمیرا محمدی کی درخواست پر سماعت ہوئی۔ درخواست گزار خاتون نے کہا کہ کنٹونمنٹ علاقوں میں بھی آوارہ کتوں کی بھرمار ہوگئی ہے۔ سی بی سی قانون میں آوارہ کتوں کو ختم کرنا درج ہے۔ درخواستیں دینے کے باوجود متعلقہ حکام کتوں کے خلاف کارروائی نہیں کررہے۔

چیف جسٹس نے سرکاری وکیل سے مکالمے میں کہا کہ کتنے ظالم لوگ ہیں کتوں کو بھی مارتے ہیں؟ سرکاری وکیل نے موقف اپنایا کہ کتوں کی افزائش کی روک تھام کے لیے قوانین موجود ہیں مگر مارنے کا قانون میں تذکرہ نہیں۔

عدالت نے کنٹونمنٹ بورڈ کلفٹن اور دیگر سے جواب طلب کرلیا۔ عدالت کی کتوں کے خلاف کارروائی سے متعلق درخواستیں ایک ساتھ چلانے کی ہدایت کردی۔