اسرائیلی لابی نے عمران خان کو اپنے مقاصد کے لیے استعمال کیا، فیاض الحسن چوہان

استحکام پاکستان پارٹی کے رہنما فیاض الحسن چوہان نے الزام لگایا ہے کہ اسرائیلی لابی نے چیئرمین پی ٹی آئی کو اپنے مقاصد کیلئےاستعمال کیا۔

فیاض الحسن چوہان نے میڈیا سے بات کرتے ہوئے کہا کہ سابق امریکی صدرڈونلڈ ٹرمپ کیخلاف سرکاری کاغذات پاس رکھنے پر کیس چل رہا ہے،آج کا انکشاف ہے پاکستان کے سابق وزیراعظم نے سائفر گم کردیا۔چیئرمین پی ٹی آئی نے پہلے سائفر کو لہرایا اور امریکا سمیت دیگر ممالک پر الزامات لگائے، چیئرمین پی ٹی آئی نے سائفر لہرا کر کہا امریکا ان کیخلاف سازش کررہا ہے۔

فیاض الحسن چوہان نے کہا کہ ہم نے چیئرمین پی ٹی آئی سے کہا تھا اگر یہ سازش ہے تو ہم آپ کے ساتھ کھڑے ہیں، اس وقت چیئرمین پی ٹی آئی کا بھرپور ساتھ دیا اور ان کے ساتھ چلے، 4 ماہ بعد پی ٹی آئی کے ترجمانوں  کو یہ بات سمجھائی گئی سائفر کے متعلق کوئی بات نہیں کرنی۔ یہ بھی سمجھایا گیا بیانات میں یہ کہنا ہے چیئرمین پی ٹی آئی امریکا کے مخالف نہیں، ترجمانوں کو یہ بھی کہا گیا وہ بیانات میں کہیں امریکا چیئرمین پی ٹی آئی  کے ساتھ ہے۔

فیاض الحسن چوہان نے کہا کہ سائفر کی سازش 9 مئی کے واقعہ کے ساتھ جڑی ہوئی ہے،اسرائیلی لابی نے چیئرمین پی ٹی آئی کو اپنے مقاصد کیلئےاستعمال کیا،اسرائیل کا مقصد پاکستان کو معاشی طور پر غیر مستحکم  کرنا تھا،اسرائیل نے اپنے مذموم مقاصد کی تکمیل کیلئے چیئرمین پی ٹی آئی کے ذریعے سازش کی۔ چیئرمین پی ٹی آئی کا بیانیہ بھی پاکستان کو غیر مستحکم اور معاشی طور پر تباہ کرنا رہا ہے۔ چیئرمین پی ٹی آئی کو سمجھایا تھا کہ فوج کیخلاف سازش نہ کریں،ملک کیخلاف بیانات نہ دیں۔