کراچی: ڈیفنس کے علاقے میں فلور مل مالک قتل، کچھ بھی نہیں چھینا گیا، پولیس

کراچی کے علاقے ڈیفنس میں کار پر فائرنگ کے نتیجے میں فلور مل مالک ہلاک ہوگیا، مقتول کی شناخت تریسٹھ سالہ آصف بلوانی کے نام سے ہوئی،فائرنگ کے باعث ڈرائیور کار پر قابو نا رکھ سکا اور گاڑی سڑک کنارے کھڑے ٹرک سے جا ٹکرائی۔

لواحقین کے مطابق مقتول بینک سے رقم لے کر گھر کی جانب آرہے تھے کہ انہیں راستے میں نشانہ بنایا گیا، واردات کی اطلاع پر پولیس جائے وقوع پر پہنچی اور شواہد اکھٹے کیے۔

ڈی آئی جی ساؤتھ سید اسد رضا نے بتایا کہ پولیس کو مقتول کی گاڑی سے 6 لاکھ روپےکی رقم ملی ہے،مقتول آصف بلوانی رقم کہاں سے لارہا تھا اسکی تحقیقات کر رہے ہیں۔۔

سینئر پولیس افسر سید اسد رضا نے کہا کہ جس بینک میں مقتول کا اکاوئنٹ ہے وہاں سے رقم نہیں نکالی گئی،دو موٹرسائیکلوں پر سوار چار ملزمان مقتول کے تعاقب میں آئے،مقتول سے رقم اور موبائیل فون نہیں چھینا گیا۔

ڈی آئی جی ساؤتھ کا کہنا ہے کہ  تحقیقات کر رہے ہیں کہ واقعہ ڈکیتی مزاحمت ہے یا ٹارگٹ کلنگ؟ دشمنی کے حوالے سے بھی تحقیقات کر رہے ہیں،جائے وقوعہ اور اطراف کی سی سی ٹی وی فوٹیجیز حاصل کر رہےہیں۔