کراچی: غیرملکیوں پر حملے میں ملوث دہشتگرد کی شناخت ہوگئی، زخمی سکیورٹی گارڈ ہسپتال میں دم توڑ گیا

کراچی کے علاقے لانڈھی میں مانسہرہ کالونی میں غیر ملکیوں پر حملے میں ملوث ایک دہشتگرد کی شناخت ہوگئی۔

پولیس حکام کے مطابق ہلاک دہشتگرد کی شناخت سہیل احمد کے نام سے ہوئی ہے،ہلاک دہشتگرد پنجگور بلوچستان کا رہائشی ہے۔

دریں اثنا غیر ملکیوں پر حملے میں شدید زخمی ہونے والا سیکیورٹی گارڈ ہسپتال میں دم توڑ گیا، نور محمد غیرملکیوں کے ساتھ سیکیورٹی ڈیوٹی پر مامور تھا، شدید زخمی حالت میں جناح اسپتال منتقل کیا گیا تھا۔

دہشت گرد حملے میں دو سیکیورٹی گارڈ سمیت تین افراد زخمی ہوئے تھے،زخمی راہ گیر سلمان صادق کی حالت بھی تشویشناک بتائی جاتی ہے۔

مقتول سیکیورٹی گارڈ نور محمد سانگھڑ کا رہائشی تھا،نور محمد نے سوگواران میں بیوہ اور تین بچے چھوڑے ہیں،مقتول سیکیورٹی گارڈ نور محمد گزری میں قائم کمپنی کے کوارٹر میں رہائش پذیر تھا۔