کراچی: ویزا فراڈ میں ملوث دو غیرقانونی ٹریول ایجنٹ گرفتار

ایف آئی اے انسداد انسانی اسمگلنگ سرکل کراچی نے شہر کے مختلف علاقوں میں کاروائی کرتے ہوئے دو ٹریول ایجنٹوں کو گرفتار کرلیا۔

ترجمان ایف ائی اے کے مطابق گرفتار ملزمان ویزا فراڈ کے گھناؤنے جرم میں ملوث تھے، ملزمان غیر قانونی ٹریول ایجنسیاں چلارہے تھے، گرفتار ملزمان میں عباس علی اور شہزاد شامل ہیں۔

ملزم شہزاد کو ایف بی ایریا میں واقع ٹریول ایجنسی سے گرفتار کیا گیاجبکہ ملزم عباس کو ایک دوسری ٹریول ایجنسی سے گرفتار کیا گیا، ملزمان ٹریول ایجنسیز کے حوالے سے کسی قسم کا لائسنس فراہم کرنے میں ناکام رہے۔

ملزمان سادہ لوح شہریوں کو عمرے کا جھانسہ دے کر بھاری رقوم وصول کر رہے تھے،ابتدائی تفتیش کے مطابق ملزمان نے متعدد شہریوں سے عمرے اور زیارت ویزے کے نام پر پاسپورٹ وصول کئے تھے، چھاپوں کے دوران ملزمان کے قبضے سے متعدد پاسپورٹس، اسٹمپس اور دیگر دستاویزات برآمد کی گئیں۔

ملزمان کے خلاف کاروائی خفیہ اطلاع پر عمل میں لائی گئی، گرفتار ملزمان سے تفتیش کا آغاز کردیا گیا جبکہ انکی نشان دہی پر دیگر ملزمان کی گرفتاری کے لئے چھاپے مارے جارہے ہیں۔