لاہور: اندرون بھاٹی گیٹ کے ایک گھر میں آگ سے خاندان کے 10 افراد جاں بحق

لاہور کے علاقے اندرون  بھاٹی گیٹ کے محلہ سمیاں میں گھرمیں آگ لگنے سے خاندان کے 10 افراد  دم گھٹنے سے ہلاک ہو گئے۔ابتدائی تحقیقات کے مطابق گھر میں شارٹ سرکٹ سے آگ لگی۔

ریسکیو ٹیموں کے مطابق فریج کے ساتھ لگے سٹیبلائزر میں آگ لگی جس نے پورے گھر کو لپیٹ میں لے لیا، آگ لگنے سے عمارت میں موجود تمام افراد پھنس گئے تھے۔

عمارت میں ظہیر الدین بابر کی فیملی رہائش پذیر تھی، متوفیوں میں مالک مکان کی اہلیہ، بیٹا ،بیٹی ،بہو، پوتے ،پوتیاں شامل  ہیں، جن کی عمریں اور نام بھی بتائے گئے ہیں، ریسکیو کے مطابق 60سالہ سائرہ ،40سالہ فرزانہ ،18سالہ ثانیہ،16سالہ عادل،13سالہ سیماب، 13سالہ مونو ، 4سالہ انزل فاطمہ جاں بحق ہوئے۔

ریسکیو ٹیموں نے آگ پر قابو پالیا، لاشیں ہسپتال منتقل کر دی گئی ہیں اور کولنگ کاعمل جاری ہے۔

ریسکیو کا کہنا ہے کہ یہ ایک سے ڈیڑھ مرلے کا گھر تھا، جو تین منزلہ تھا اور تینوں منزلوں پر ایک ایک کمرہ تھا، آگ لگنے کی کال رات دو بجے ملی۔

گھر کا مالک ظہرالدین پورے خاندان کی موت پر غم سے نڈھال ہے، اس کا کہنا ہے کہ اس کا بیٹا بہت محنت کر کے وکیل بنا تھا وہ بیوی بچوں سمیت اس دنیا سے چلا گیا۔

ظہیرالدین نے بتایا کہ ڈیڑھ مرلہ کے گھر میں بچوں سمیت 11 لوگ موجود تھے اگ لگنے کے بعد اہل محلہ نے ریسکیو اور پولیس کو اطلاع کی اور دروازہ توڑ کر میرے ایک بیٹے کو بچانے میں کامیاب ہو گئے فیملی کے سربراہ نے اس سانحہ کا ذمہ دار واپڈا کو ٹھہرایا ہے۔

موقع پر موجود ایس ایچ او بھاٹی گیٹ کا کہنا ہے کہ ریسکیو نے موقع پر پہنچ کر باقی گھروں اگ کی لپیٹ میں انے سے بچایا ہے ، مزید چھان بین کے لیے ہماری انویسٹیگیشن ٹیم کام کر رہی ہے۔

نگراں وزیرِ اعلیٰ پنجاب محسن نقوی نے گھر میں آگ لگنے سے 10 افراد کی ہلاکت پر افسوس کا اظہار کیا۔

وزیرِ اعلیٰ محسن نقوی نے جاں بحق افراد کے لواحقین سے دلی ہمدردی و  تعزیت کا اظہار کرتے ہوئے واقعے پر کمشنر لاہور ڈویژن سے رپورٹ طلب کر لی۔

محسن بقوی نے گھر میں آگ لگنے کے واقعے کی جامع تحقیقات کا حکم دے دیا۔