کراچی میں ٹریفک قوانین کی مسلسل خلاف ورزی پر لائسنس بلاک کرنے کی تیاری

کراچی ٹریفک پولیس نے مختلف کاروائیوں میں پکڑے گئے دس ہزار سے زائد پریشر ہارنز اور فینسی نمبر پلیٹس تلف کردیں۔

گارڈن ہیڈ کوارٹر میں تقریب سے خطاب میں ڈی آئی جی ٹریفک نے بتایا کہ ٹریفک مانیٹرنگ یونٹ کو اپ گریڈ کیا گیا ہے ، شہر میں ایک ہزار سے زائد کیمرے لگے ہیں، ٹریفک پولیس نے کمیونٹی پولیس سے ان کیمروں کا ایکسس لیا ہے۔

ڈی آئی جی ٹریفک نے کہا کہ ڈرائیونگ لائسنس اور ایکسائز کا ڈیٹا بھی ٹریفک پولیس کے پاس موجود ہے، ٹریفک سسٹم میں بہتری کے لیے ڈرائیونگ لائسنس پر جدید ممالک کی طرز پر پوائنٹ سسٹم شروع کررہے ہیں جس سے ٹریفک قوانین کی مسلسل خلاف ورزی کرنے والوں کا لائسنس بلاک کیا جاسکے گا۔

 تقریب کے بعد شہر میں مختلف کاروائیوں میں نکالے گئے دس ہزار سے زائد پریشر ہارن اور ہزاروں فینسی نمبر پلیٹوں کو بلڈوزر کی مدد سے تلف کیا گیا۔