خیبر پختونخوا کے بلدیاتی نمائندوں نے صوبائی حکومت کے خلاف تحریک چلانے کا اعلان کردیا

خیبر پختونخواکے بلدیاتی نمائندوں نے صوبائی حکومت کیخلاف تحریک شروع کرنے کااعلان کردیا۔ پشاور پریس کلب میں کونسلرز کے ہمراہ نیوز کانفرنس کے دوران میئر پشاور زبیر علی نے بتایا کہ صوبے میں 2سال سے بلدیاتی نمائندوں کو فنڈز نہیں دیئے جارہے، ۔۔حقوق حاصل کرنے کیلئے ہرتحصیل کی سطح پر احتجاج ہوگا۔

میئر پشاور زبیر علی نے کہا کہ عدالت سے بھی انصاف نہیں ملا، حکومت حیلے بہانوں سے کام لے رہی ہے،حقوق حاصل کرنے کیلئے ہرتحصیل کی سطح پر احتجاج ہوگا۔

مئیر پشاور زبیر علی نے کہا کہ سندھ ہائیکورٹ اور سپریم کورٹ نے بلدیاتی حکومت کے حق میں فیصلہ کئے لیکن پشاور ہائیکورٹ نے بلدیاتی قانون کے خلاف کیس میں ہمیں یہ کہہ کر واپس کردیا کہ صوبائی حکومت سے رجوع کرلیں۔

انہوں نے کہا کہ 40 سال میں پہلی دفعہ دیکھ رہا ہوں کہ صفائی ستھرائی کا ادارہ بھی کمشنر کے حوالہ کیا، اگر یہ کام بھی ضلعی انتظامیہ نے کو دینا ہے تو پھر بلدیاتی نظام کیوں لائے۔

مئیر پشاور زبیر علی نے کہا کہ تحریک انصاف حکومت نے بلدیاتی نظام کو مفلوج کرکے رکھ دیا ہے۔ایسا نظام بنایا گیا جس کو نہ بیوروکریسی سمجھتی اور نہ ہی بلدیاتی نمائندے۔اگر ایسا نظام بنانا تھا تو اس ختم کرنا ہی بہتر ہے۔ہمیں ایسا نظام نہیں چاہئے جس میں عوآم کی خدمت نہ ہو۔