پی آئی اے ، بجلی کمپنیاں اور ریلوے سمیت کئی ادارے خزانے پر بوجھ بن گئے

ڈسکوز، پی آئی اے، این ایچ اے سمیت کئی ادارے قومی خزانے پر بوجھ بن گئے، 2022 میں کس ادارے نے کتنا نقصان کیا؟ وزارت خزانہ کی دستاویز نے بھانڈا پھوڑ دیا۔

وزارت خزانہ کی دستاویز کے مطابق حکومتی ملکیتی اداروں کے ایک سال میں 729 ارب روپے سے زائد کے نقصانات رہے۔

دستاویز کے مطابق 2022 میں نیشنل ہائی وے اتھارٹی کے نقصانات 168 ارب روپے سے تجاوز کرگئے، جبکہ پشاور الیکٹرک سپلائی کمپنی کے نقصانات 102 ارب سے زیادہ رہے، اسی طرح پی آئی اے کے نقصانات 97 ارب 53 کروڑ روپے سے زیادہ رہے۔

دستاویز کے مطابق کوئٹہ الیکٹرک سپلائی کمپنی کے نقصانات 76 ارب 41 کروڑ روپے سے زیادہ رہے، حیدرآباد الیکٹرک سپلائی کمپنی کے نقصانات 54 ارب 40 کروڑ روپے سے زیادہ رہے۔

دستاویز میں بتایا گیا کہ پاکستان ریلویز کے نقصانات 47 ارب 48 کروڑ روپے سے زیادہ رہے، لاہور الیکٹرک سپلائی کمپنی کو 30 ارب 21 کروڑ روپے مالی نقصان کا سامنا رہا، سکھر الیکٹرک سپلائی کمپنی کے نقصانات 29 ارب 48 کروڑسے زیادہ رہے، میپکو کے 22 ارب روپے سے زیادہ اور ٹیسکو کے نقصانات 21 ارب روپے زیادہ رہے۔

دیگر حکومتی ملکیتی اداروں کے نقصانات 80 ارب روپے سے زیادہ ریکارڈ کئے گئے۔