مریم نواز نے ایلیٹ فورس کی وردی بھی پہن لی، پولیس پر لگے دھبے ہم دھوئیں گے، وزیر اعلیٰ پنجاب

وزیراعلیٰ پنجاب مریم نواز شریف نے پولیس کے بعد اب ایلیٹ فورس کی وردی پہن کر پاسنگ آؤٹ پریڈ میں شرکت کی ہے۔

وزیراعلیٰ پنجاب مریم نواز شریف نے لاہور میں ایلیٹ فورس پنجاب کی پاسنگ آؤٹ پریڈ سے خطاب کے دوران کہا کہ مجھے جان کر یہ خوشی ہوئی کہ پاس آؤٹ ہونے والے  860 جوانوں میں 70 خواتین بھی شامل ہیں۔

اُن کا کہنا تھا کہ یہ وردی نہیں ہے، قومی خدمت ہے جو چند قوم کے بیٹے بیٹیوں کے نصیب میں آتی ہے، وردی اعزاز کے ساتھ ساتھ بہت بڑا امتحان بھی ہے، وہ وقت دور نہیں جب پولیس پر لگے دھبے ہم دھوئیں گے۔

وزیراعلیٰ پنجاب مریم نواز نے کہا ہے کہ جب بھی کسی شہید کو دیکھتی ہوں یہ سوچتی ہوں کہ شہادت کاجذبہ بھی کیا جذبہ ہے، تمام شہدا کو سلام، خراج عقیدت پیش کرتی ہوں۔

انہوں نے مزید کہا کہ دعا ہے کہ اللّٰہ تعالیٰ تمام شہدا کو بلند درجات سے نوازے۔

وزیراعلیٰ پنجاب مریم نواز کا کہنا تھا کہ آئی جی پنجاب پولیس فورس میں تبدیلیاں لا رہے ہیں، آئی جی پنجاب کو جو بھی ضرورت ہو گی انہیں فراہم کیا جائے گا، وسائل میں کمی نہیں ہوگی۔