اٹلی کے قریب تارکین وطن کی کشتی ڈوب گئی،41 ہلاکتوں کی اطلاع

وسطی بحیرہ روم میں ایک کشتی کے ڈوبنے سے اکتالیس تارکین وطن ہلاک ہو گئے، اٹلی کی نیوزایجنسی کے مطابق واقعہ پچھلے ہفتے پیش آیا اورحادثے میں زندہ بچ جانے والے تارکین وطن اٹلی کے جزیرے لامپیدوسا پہنچنے پر اس بات کا انکشاف ہوا۔

آنسا نے کہا کہ جہاز کے تباہ ہونے سے بچ جانے والے چار افراد نے امدادی کارکنوں کو بتایا کہ وہ ایک کشتی پر سوار تھے جس میں تین بچوں سمیت 45 افراد سوار تھے۔

زندہ بچ جانے والوں کے حوالے سے بتایا گیا کہ کشتی جمعرات کی صبح تیونس کے علاقے صفاقس سے روانہ ہوئی لیکن چند گھنٹوں کے بعد الٹ گئی اور ڈوب گئی۔

آئیوری کوسٹ اور گنی سے تعلق رکھنے والے تین مرد اور ایک عورت اس حادثے میں زندہ بچ گئے، انہوں نے بتایا کہ انھیں ایک کارگو جہاز نے بچایا کر اطالوی کوسٹ گارڈ کے جہاز میں منتقل کیا۔

کوسٹ گارڈ نے فوری طور پر تبصرہ کی درخواست کا جواب نہیں دیا۔

یہ واضح نہیں ہے کہ آیا آنسا کی طرف سے دی گئی خبروں کا تعلق ان دو جہازوں کے ٹوٹنے سے ہے جن کی کوسٹ گارڈ نے اتوار کو اطلاع دی تھی، اور کہا تھا کہ ان میں سے تقریباً 30 افراد لاپتہ ہیں۔کوسٹ گارڈ نے یہ بھی کہا تھا کہ انہوں نے 57 زندہ بچ جانے والے اور دو لاشیں برآمد کی ہیں۔

اس کے علاوہ، تیونس کے حکام نے پیر کے روز کہا کہ انہوں نے اتوار کو صفاقس کے قریب ایک جہاز کے ملبے سے 11 لاشیں برآمد کی ہیں، جب کہ 44 تارکین وطن ابھی تک اس ڈوبنے سے لاپتہ ہیں۔

اٹلی میں اس سال اب تک سمندر کے راستے تقریباً 93,700 تارکین وطن کی آمد ریکارڈ کی گئی جبکہ 2022 کی اسی مدت میں یہ تعداد 44،700 تھی۔