اراضی کیس میں غلط بیانی، ڈپٹی کمشنر راولپنڈی نے عدالت سے غیرمشروط معافی مانگ لی

ہائیکورٹ راولپنڈی بنچ نے اراضی کیس میں غلط بیانی سے متعلق توہین عدالت کی کاروائی پر ڈپٹی کمشنر راولپنڈی حسن وقار چیمہ اور اے ڈی سی آر نیبل ریاض نے غیر مشروط معافی مانگ لی۔ متعلقہ حکام نے عدالتی حکم کے باوجود درخواست گزار کا معاملہ سنے بغیر چیف سیٹلمنٹ کمشنر برانچ لاہور کو بھجوا دیا تھا۔

ڈپٹی کمشنر راولپنڈی اور اے ڈی سی ریونیو راولپنڈی و گوجرخان توہین عدالت کاروائی کے موقع پر ہائیکورٹ راولپنڈی بنچ پیش ہوئے۔ دوران سماعت ڈپٹی کمشنر راولپنڈی حسن وقار چیمہ اور اے ڈی سی آر نیبل ریاض نے عدالت میں غیر مشروط معافی مانگتے ہوئے یقین دھانی کرائی کہ آئندہ عدالتی احکامات کی خلاف ورزی نہیں ہوگی لہذا معافی کی استدعا منظور کی جائے۔

جسٹس مرزا وقاص رؤف کی ڈپٹی کمشنر اور دیگر افسران کو آئندہ عدالتی حکم عدولی سے محتاط رہنے کی ہدایت کی۔ عدالت نے شہری سید ظہیر علی کے اراضی کیس میں انتظامیہ کی غلط بیانی پر توہین عدالت کی کاروائی کی تھی۔

واضح رہے کہ گوجر خان کے رہاشی سید ظہیر علی نے مقامی ہاؤسنگ اسکیم سے متعلق ایک درخواست دائر کی تھی جس پر ہائیکورٹ نے معاملہ ڈی سی اور اے ڈی سی آر کو بھجواتے ہوئے اسے سن کر فیصلہ کرنے کی ہدایت کی تھی تاہم متعلقہ حکام نے اس معاملہ کو سنے بغیر ہی چیف سیٹلمنٹ کمشنر برانچ لاہور کو بھجوا دیا تھا۔