سیاست میں غلطیاں تسلیم کرنی چاہئیں،عمران خان کا رویہ ملک کی جڑیں کھوکھلی کر رہا ہے، سپیکر پنجاب اسمبلی

سپیکر اسمبلی ملک محمد احمد خان نے کہا ہے کہ وزیر اعظم شہباز شریف نے پارٹی صدارت کا عہدہ سنبھالتے ہوئے اسے امانت قرار دیا تھا۔شہبازشریف نے واضح کیا تھا کہ میرے قائد و رہنما نوازشریف ہیں۔پارٹی صدارت کا عہدہ نوازشریف کی امانت ہے۔
میڈیا سے غیررسمی گفتگو میں ملک احمد خان نے کہا کہ سیاست میں اپنی کی ہوئی غلطیاں ماننی چاہئیں،سیاست سے ڈائیلاگ نکال دیں گے تو سیاست ختم ہوجائے گی، عمران خان کا صرف اسٹیبلشمنٹ سے مذاکرات کا رویہ معاشرے کی ترقی کےلئے زہر قاتل ہے،عمران خان کا بات نہ کرنے کا رویہ بنیادی برائی ہے، اسی بنیادی برائی نے اس ملک کی جڑیں کھوکھلی کی ہیں، عمران خان جڑیں کھوکھلی کرنے میں اپنا حصہ بخوبی ڈال رہے ہیں، کشمیر میں عوامی مینڈیٹ سے حکومت بنی ہے۔
سپیکر پنجاب اسمبلی نے کہا کہ عارف علوی کا احترام اپنی جگہ پر لیکن انہیں اس قسم کی باتوں سے باہر نکلنا چاہئے،کشمیر میں ہونے والے مسائل کا حل بات چیت ہے، طاقت کا استعمال وہاں کوئی مسائل کا حل نہیں، کل ایک پولیس والے کی جان گئی ہے، ہمارے بچے روزانہ مظاہرین کو کنٹرول کرنے میں نقصان اٹھا رہے ہیں۔
ملک احمد خان نے کہا کہ گندم کے کاشتکار کے حوالے سے تمام فریقین سے بات چیت کرنے کی تجویز دی تھی، حکومت اب چھ ایکٹر کے کاشتکار سے گندم خریدنے کی پالیسی بنا رہی ہے، دیکھتے ہیں اس پالیسی کا عام کاشتکار پر کیا اثر پڑتا ہے۔