میری اہلیہ کی لندن میں بھی جائیداد ہے، قانونی طور پر کی گئی سرمایہ کاری غلط نہیں، محسن نقوی

وفاقی وزیر داخلہ محسن نقوی نے کہا ہے کہ اس بار ڈسکوز میں اووربلنگ ختم اور لوگوں کو ریفنڈ ملنا شروع ہوا ہے،کچھ ڈسکوز میں کام چل رہا ہے، لوگوں کو لیسکو کی طرح ریلیف ملے گا،18 ویں ترمیم کے بعد صوبوں میں مرکز صرف مدد فراہم کرتا ہے، آزاد کشمیر یا کہیں بھی جاکر لا اینڈ آرڈر کے فیصلے نہیں کرسکتا۔

وفاقی وزیر داخلہ نے کہا کہ آزاد کشمیر کے عوام کو بروقت ریلیف ملا ہے،آزاد کشمیر کے عوام کیلئے 23 ارب روپے دے دیئے گئے ہیں،18 ویں ترمیم کے بعد امن کی صورتحال صوبے دیکھتے ہیں،لوگوں کو اعتراض تھا کہ میں آزاد کشمیر کیوں نہیں گیا،وزیراعظم اور آزاد کشمیر کے وزیراعظم نے امن و امان کی صورتحال پر ملاقات کی۔

محسن نقوی نے کہا کہ میری اہلیہ کی پراپرٹی 2017 سے تھی جس کو بیچ دیا گیا تھا،پراپرٹی کو ڈکلیئر کیا گیا ہے،الیکشن کمیشن کے گوشواروں میں پراپرٹی کا ذکر ہے،اگر کسی نے پراپرٹی کو ڈکلیئر نہیں کیا تو اسے ایشو بنانا چاہیے،بطور بزنس مین جہاں چاہوں گا انویسٹمنٹ کروں گا۔

وفاقی وزیر داخلہ نے کہا کہ میری اہلیہ کی لندن میں بھی جائیداد ہے،قانونی طریقے سے بیرون ملک سرمایہ کاری کرنا غلط نہیں ہے۔