نواز شریف ایک 73 سالہ بوڑھی سے ڈر کے گھر بیٹھے ہیں، یاسمین راشد

سابق وزیر اعظم نواز شریف کے مدمقابل تحریک انصاف کی امیدوار ڈاکٹر یاسمین راشد نے الزام لگایا ہے کہ  اُن کے ورکرز اور سپورٹرز کو انتخابی مہم چلانے نہیں دی جارہی اور ملازموں کو آفس سے  گرفتار کیا جارہا ہے۔

لاہور کی انسداد دہشت گردی عدالت میں میڈیا سے غیر رسمی گفتگو میں ڈاکٹر یاسمین راشد نے کہا کہ نواز شریف ایک 73 سالہ بوڑھی خاتون سے ڈر کر اندر بیٹھے ہوئے ہیں۔ نواز شریف باہر نکلیں ان کو لوگ بتائیں گے۔

تحریک انصاف کی رہنما نے زور دیا کہ آٹھ فروری کو عوام گھروں سے باہر ضرور نکلیں اور ووٹ کا حق استعمال کریں۔یہ جنگ عوام کے مستقبل کی جنگ ہے

 ڈاکٹر یاسمین راشد نے کہا کہ عوام اپنے ووٹ استعمال کرنے کے بعد ووٹ کی حفاظت بھی کریں، ووٹ کی حفاظت نہ کی تو عوام کے ووٹ چور لوٹ لیں گے۔

  ڈاکٹر یاسمین راشد سے پولیس کی تلخ کلامی  بھی ہوئی۔ اس موقع پر پولیس انسپکٹر نے کہا کہ اُن کے گھر والے ووٹ آپ کو دیں گے۔  ڈاکٹر یاسمین راشد نے کہا کہ وہ آٹھ ماہ سے خاموش ہیں۔ ان کے بات کرنے پر بھی پابندی ہے۔