شوکت عزیز صدیقی سے کبھی ملا نہ نواز شریف کی اپیلوں پر بات کی، جنرل ریٹائرڈ فیض حمید

سابق جج اسلام آباد ہائیکورٹ شوکت عزیز صدیقی کی برطرفی کیس میں سابق ڈی جی آئی ایس آئی فیض حمید نے جواب جمع کرا دیا،جنرل(ر) فیض حمید نے عدلیہ پر اثرانداز ہونے کے الزام کو مسترد کر دیا۔ سابق چیف جسٹس اسلام آباد ہائیکورٹ انور کانسی نے بھی جواب سپریم کورٹ میں جمع کروا دیا۔

سابق ڈی جی آئی ایس آئی فیض حمید نے سپریم کورٹ میں جمع کرائے گئے جواب میں کہا کہ شوکت عزیز صدیقی نے اپنی تقریر اور جوڈیشل کونسل کے سامنے کسی مبینہ ملاقات کا ذکر نہیں کیا،شوکت عزیز صدیقی سے کبھی رابطہ نہیں کیا۔

 فیض حمید نے تحریری جواب میں کہا کہ شوکت عزیز صدیقی سے ملا نہ نواز شریف کی اپیلوں پر بات ہوئی، کبھی یہ نہیں کہا کہ ہماری دو سال کی محنت ضائع ہو جائے گی،شوکت عزیز صدیقی کے تمام الزامات بے بنیاد اور من گھڑت ہیں۔

فیض حمید نے جواب میں کہا کہ شوکت عزیز صدیقی کے الزامات بعد میں آنے والے خیالات کے مترادف ہیں۔

سابق چیف جسٹس اسلام آباد ہائیکورٹ انور کانسی نے سپریم کورٹ میں جمع کرائے گئے جواب میں شوکت عزیز صدیقی کے تمام الزامات کو مسترد کیا۔

برگیڈیئر (ر) عرفان رامے نے بھی جواب سپریم کورٹ میں جمع کرایا ہے۔ عرفان رامے نے بھی شوکت عزیز صدیقی کے الزامات اور ملاقات کی تردید کی۔