عید کے دن عمران خان اور بشریٰ بی بی کی تنہائی میں ملاقات کرائی جائے، اسلام آباد ہائیکورٹ

بشریٰ بی بی کی عمران خان سے ملاقات اور بنی گالا سب جیل سے اڈیالہ جیل منتقلی کی درخواست پر اسلام آباد ہائی کورٹ نے ہفتے میں ایک دن عمران خان اور بشریٰ بی بی کی ملاقات کرانے کی ہدایت کر دی۔عید کے موقع پر بھی بانی پی ٹی آئی اور اہلیہ کی ملاقات کرانے کا حکم دیا ہے۔

جسٹس میاں گل حسن اورنگزیب نے بشری بی بی کی درخواست پر سماعت کی۔

31 جنوری کے بعد کتنی نئی خواتین ملزمان اڈیالہ جیل داخل ہوئیں؟ اس سے متعلق رپورٹ عدالت میں پیش کی گئی۔عدالتی حکم پر اسسٹنٹ سپرنٹنڈنٹ جیل وقیع الزمان نے رپورٹ عدالت میں پیش کی،

جیل انتظامیہ کی رپورٹ کے مطابق 31 جنوری کے بعد 141 نئی خواتین ملزمان کو مختلف کیسوں میں داخل جیل کیا گیا۔

بانی پی ٹی آئی اور بشری بی بی کی 190 ملین پاؤنڈ کیس میں ملاقاتوں کی رپورٹ بھی عدالت کو پیش کی گئی۔

رپورٹ کے مطابق جیل ٹرائل کے دوران 31 جنوری کے بعد بانی پی ٹی آئی اور بشری بی بی کی 10 ملاقاتیں کروائی گئیں،تمام ملاقاتیں 190 ملین پاؤنڈ کیس کی سماعت کے دن ہوتی رہیں۔