پاکستان کے فی البدیہہ تھیٹر اور امریکی ڈرامہ گروپ نے شائقین کے دل جیت لیے

 آرٹس کونسل آف پاکستان کراچی کی جانب سے تھیٹر کا بین الاقوامی میلہ ”پاکستان تھیٹر فیسٹیول“ آب و تاب سے جاری ہے، فیسٹیول کے دوسرے روز دو کھیل پیش کیے گئے، جس میں پہلا فی البدیہہ تھیٹر ”کوئی تیاری نہیں“ اسٹوڈیو I میں پیش کیاگیا جس کے ہدایت کار منیب الرحمن تھے ، فی البدیہہ تھیٹر کی خاص بات کھیل میں پہلے سے طے شدہ اسکرپٹ کا نہ ہونا تھاجسے آرٹس کونسل آف پاکستان کراچی کی تھیٹر اکیڈمی کے طلباءکی اداکاری نے شائقین کو ہنسے پر مجبور کر دیا،

 تھیٹر شائقین کی بڑی تعداد ”کوئی تیاری نہیں“ کھیل سے محظوظ ہوئی۔ آرٹس کونسل آف پاکستان کراچی کی تھیٹر اکیڈمی کے طلباءنے حاضرین کی جانب سے دیے گئے موضوعات پر خاکے پیش کیے ۔

۔ دوسرا کھیل ”تھرو دا وویز“ امریکن تھیٹر گروپ اپ لفٹ کی جانب سے پیش کیا گیا جس کی ہدایت کار فزیکل تھیٹر کی ماہر ہینا گیف تھیں، ڈائیلاگز کے بغیر صرف موسیقی اور ایکٹنگ کے ذریعے تین خواتین کی کہانی کو خوبصورتی سے پیش کیا گیا جسے شائقین کی جانب سے بے حد سراہا گیا۔ امریکن تھیٹر گروپ ممبران کا کہنا تھا کہ پاکستانی شائقین تھیٹر کے سامنے پرفارم کرنا بہت زبردست تجربہ تھا۔