شکاگو میں پاکستانی قونصل خانے کا تجارت و سرمایہ کاری پر سیمینار

شکاگو میں پاکستان کے قونصل جنرل نے سی اے پی آر سی مڈویسٹ کے تعاون سے ’ امریکا کے خطے کے ساتھ پاکستان کی شراکت، تجارت اور سرمایہ کاری، سیاحت اور تعلیم میں مواقع‘ کے موضوع پر سیمینار کا انعقاد کیا۔

قونصلیٹ جنرل میں منعقد ہونے والی اس تقریب میں بڑی تعداد میں تاجروں اور سی ای اوز، ٹیک ایگزیکٹوز، تھنک ٹینک کے نمائندوں اور کمیونٹی کے ممتاز افراد نے شرکت کی۔

مقررین میں قونصل جنرل طارق کریم، سی اے پی آر سی بورڈط کے رکن یوری ہوفمین اور دیگر شامل تھے۔

اس موقع پر خطاب کرتے ہوئے قونصل جنرل طارق کریم نے امریکہ کے وسط مغربی خطے کے ساتھ پاکستان کی شراکت داری کو بڑھانے کے لیے اقتصادی سفارت کاری کو اپنی اہم ترجیحات میں سے ایک قرار دیا۔

قونصل جنرل نے پاکستان کو دنیا میں ایک اہم کاروبار، تجارت، سرمایہ کاری اور سیاحتی مقام قرار دیا۔ انہوں نے آئی ٹی سیکٹر اور ٹیک ایکو سسٹم کی تیز رفتار ترقی سمیت مختلف شعبوں میں پاکستان کی کامیابیوں کی کہانیاں شیئر کیں۔

 قونصل جنرل نے 12 وسط مغربی ریاستوں کے ساتھ پاکستان کے بڑھتے ہوئے تعلقات پر روشنی ڈالی، جس کی عکاسی تیزی سے بڑھتی ہوئی تجارت اور پاکستانی برآمدات، سرمایہ کاری اور عوام کے درمیان رابطوں سے ہوتی ہے۔ انہوں نے کہا کہ پاکستان اور امریکہ کے وسط مغربی خطے کے درمیان تجارت اور سرمایہ کاری، ٹیکنالوجی کے شعبوں میں تعلقات کو مزید فروغ دینے کے بے پناہ امکانات ہیں۔

 قونصل جنرل طارق کریم نے مقامی سرمایہ کاروں اور تاجروں کو پاکستان میں کاروباری مواقع سے فائدہ اٹھانے کی ترغیب دی۔ انہوں نے انہیں اس سلسلے میں قونصلیٹ کی جانب سے ہر ممکن تعاون کا یقین دلایا۔

دیگر مقررین/پینلسٹ نے شرکاء کو پاکستان میں اپنے بڑھتے ہوئے کاروبار/سرمایہ کاری اور مختلف شعبوں میں کامیابی کی کہانیوں کے بارے میں آگاہ کیا۔

پینلسٹس نے اس بات پر روشنی ڈالی کہ ہنر مند اور باصلاحیت آئی ٹی افرادی قوت، مسابقتی لاگت کا فائدہ، بڑھتا ہوا سٹارٹ اپ کلچر اور انگریزی کی مہارت پاکستان کو آئی ٹی کی ترجیحی منزل بناتی ہے۔ انہوں نے پاکستان میں اپنے تیزی سے بڑھتے ہوئے آپریشنز اور آئی ٹی سروسز کی آؤٹ سورسنگ کے بارے میں بتایا۔

پینلسٹس نے پاکستان میں معدنیات کی تلاش، ہیلتھ کیئر ٹیکنالوجی، مینوفیکچرنگ، سیاحت اور تعلیم سے متعلق اپنے منصوبوں کے بارے میں بھی بتایا۔ انہوں نے پاکستان کی سیاحتی صلاحیت اور اس کے لوگوں کی مہمان نوازی پر بھی روشنی ڈالی۔