پاکستان نے الیکٹرک گاڑیوں اور بیٹریز کے شعبوں میں چین سے مدد طلب کرلی

پاکستان میں حکام نے پڑوسی ملک چین سے الیکٹرک گاڑیوں ( ای ویز) اور بیٹریوں کے شعبوں میں مدد طلب کی ہے۔

یہ پیشرفت اس وقت سامنے آئی جب بدھ کے روز اسلام آباد میں آئی ٹی اور ٹیلی کام کے نگراں وزیر ڈاکٹر عمر سیف اور پاکستان میں چین کے نئے نامزد سفیر جیانگ زیڈونگ کے درمیان ملاقات ہوئی۔

عمر سیف نے سوشل میڈیا پلیٹ فارم ایکس پر ایک پوسٹ میں کہا، پاکستان میں چین کے سفیر سے مل کر بہت اچھا لگا۔

نگران وزیر نے بتایا کہ دونوں نے "انتہائی نتیجہ خیز” بات چیت کی کہ کس طرح پاکستان چین کی ٹیکنالوجی سے فائدہ اٹھا سکتا ہے اور ای وی اور بیٹریوں، چپ مینوفیکچرنگ اور ٹیلی کام انفراسٹرکچر کے ابھرتے ہوئے ڈومینز میں آگے بڑھنے میں اس کی مدد لے سکتا ہے۔

سیف نے کہا، ہم نے خاص طور پر اس بارے میں بات کی کہ کس طرح پاکستانی آئی ٹی کمپنیاں اور سٹارٹ اپ چین کی بڑی مارکیٹ میں داخل ہو سکتے ہیں اور ہمارے ماہرین تعلیم کس طرح سنگھوا یونیورسٹی جیسی عالمی معیار کی یونیورسٹیوں کے ساتھ تعاون کر سکتے ہیں

Wonderful to meet the Ambassador of China to Pakistan. Very productive conversations on how Pakistan can benefit from technology from China and help Pakistan move forward in emerging domains of electric vehicles and batteries, chip manufacturing and telecom infrastructure. We… pic.twitter.com/6zCSj3gxrt

— Umar Saif (@umarsaif) September 27, 2023

وزارت آئی ٹی کی طرف سے جاری کردہ ایک بیان کے مطابق، وزیر نے بتایا کہ پاکستان آئی ٹی اور ٹیلی کام انفراسٹرکچر کے شعبوں میں چین کے ساتھ اسٹریٹجک شراکت داری کا خواہاں ہے۔

بیان کے مطابق، وزیر نے کہا کہ ای وی کی تیاری کے لیے پاک چین تعاون ایک سنگ میل بن سکتا ہے۔ انہوں نے بتایا کہ پاکستان میں حکام چین کے تعاون سے موبائل فون کی بیٹریوں کی مقامی پیداوار پر کام کر رہے ہیں۔

انہوں نے کہا کہ مزید یہ کہ ملک مائیکرو چپس اور دیگر ٹیلی کام مصنوعات کی تیاری کے لیے انتہائی سازگار ماحول پیش کرتا ہے۔

سیف نے اس بات پر زور دیا کہ پاکستانی سٹارٹ اپس کی چینی مارکیٹ تک رسائی کے لیے دونوں ممالک کے درمیان دو طرفہ تعاون کا فروغ ناگزیر ہے۔

سیف نے کہا، یورپ اور امریکہ کی طرح چین بھی پاکستانی آئی ٹی برآمدات کے لیے ایک پرکشش مارکیٹ بن سکتا ہے۔

نگران وزیر نے بتایا کہ ملک بھر میں آپٹیکل فائبر کیبل نیٹ ورک بچھانے کے لیے تمام ضروری اقدامات کیے جا رہے ہیں۔

دریں اثنا، چینی سفیر نے وزیر کو آئی ٹی اور ٹیلی کمیونیکیشن ڈیپارٹمنٹ میں ہر ممکن تعاون کی یقین دہانی کرائی۔