پرویز الٰہی جیل کے واش روم میں گرنے سے زخمی

لاہور کی احتساب عدالت میں پرویزالہیٰ کیخلاف کرپشن اور کک بیکس ریفرنس  کی سماعت ہوئی، پرویزالہٰی سمیت دیگر ملزمان پر آج بھی فرد جرم عائد نہیں  ہوسکی۔

احتساب عدالت کے جج زبیرشہزاد کیانی نے  ریفرنس پر سماعت کی، نیب ریفرنس میں پرویز الہی اور مونس الہی  سمیت  14 ملزمان نامزد ہیں۔

چوہدری پرویز الٰہی کا اڈیالہ جیل سے میڈیکل سرٹیفکیٹ احتساب عدالت میں پیش کیا گیا،میڈیکل رپورٹ میں کہا گیا ہے کہ چوہدری پرویز الٰہی کی صحت خراب ہے وہ سفر نہیں کر سکتے،پرویز الٰہی کو بخار ہے  اور پیٹ بھی خراب ہے،پرویز الٰہی گزشتہ دنوں واش روم میں گر گئے تھے جس سے وہ زخمی ہو گئے،ڈاکٹرز نے پرویز الٰہی کو آرام اوراعلاج کا مشورہ  دے رکھا ہے۔

احتساب عدالت نے پرویز الٰہی اور دیگر کیخلاف ریفرنس پر سماعت 4 اپریل تک ملتوی کر دی۔

شریک ملزم محمد خان بھٹی کو  احتساب عدالت میں پیش کیا گیا،احتساب عدالت نے مونس الہی کو اشتہاری قرار دے رکھا ہے،نیب نے مونس الہی کے اثاثہ جات منجمد کرنے کی رپورٹ جمع کرا رکھی ہے

نیب لاہور نے پرویز الہی سمیت دیگر کے خلاف 1 ارب 23 کروڑ روپے سے زائد مالیت کا ریفرنس دائر کر رکھا ہے۔