پوپ فرانسس نے 21 نئے کارڈینلز نامزد کر دیئے

مسیحیت کے پیشوا پوپ فرانسس نے 21 نئے کارڈینلز کے ناموں کا اعلان کردیا، جس سے کارڈینلز کے گروپ پر ان کی سوچ کے حامل افراد کی تعداد میں اضافہ ہوا ہے، کارڈینلز پوپ کے انتقال یا استعفیٰ کی صورت میں نئے پوپ کا انتخاب کرتے ہیں۔

نئے کارڈینلز کے تقرر کی تقریب 30 ستمبر کو ہوگی، ناموں کا اعلان 86 سالہ پوپ فرانسس نےسینٹ پیٹرز چوک میں دوپہر کی عبادت کے دوران کیا۔

نامزد کارڈینلز میں سے 18 کی عمر 80 سال سے کم ہے جو نئے پوپ کے انتخاب میں شریک ہوں گے، تین کی عمر 80 سال سے زیادہ ہے اور وہ ووٹنگ کے عمل میں شریک نہیں ہوں گے اور ان کی نامزدگی ان کی چرچ کے لیے خدمات کے اعتراف میں کی گئی ہے۔

تمام کارڈینلز پوپ کے انتخاب کے حتمی مرحلے سے پہلے اجتماع عام میں شرکت کے مجاز ہوتے ہیں اور 80 سال سے زیادہ عمر کے کارڈینلز اپنے کم عمر ساتھیوں کو نئے پوپ کے انتخاب کے لیے رائے دیتے ہیں۔

نئے کارڈینلز کا تعلق امریکا، اٹلی، ارجنٹینا، جنوبی افریقا، سپین، کولمبیا، جنوبی سوڈان، ہانگ کانگ، پولینڈ، ملائشیا، تنزانیہ اور پرتگال سے ہے۔

تین نئے نامزد کارڈینلز پہلے ہی ویٹی کن کے اہم عہدوں پر کام کر رہے ہیں جن میں ارجنٹینا کے آرچ بشپ بھی شامل ہیں۔