پوپ فرانسس نے ایک بار پھر غزہ اور یوکرین میں امن کی اپیل کردی

پوپ فرانسس نے سینٹ پیٹرز سکوائر میں اپنے ہفتہ وار خطاب میں یوکرین اور غزہ کے خونریز تنازعات پر افسوس کا اظہار کرتے ہوئے ایک بار پھر مذاکرات کے ذریعے امن کی اپیل کی ہے۔

"ہمیں یہ کبھی نہیں بھولنا چاہیے کہ جنگ ہمیشہ ایک شکست ہوتی ہے، ہم جنگ جاری نہیں رکھ سکتے، ہمیں ثالثی کے لیے تمام کوششیں کرنی چاہئیں، جنگ کے خاتمے کے لیے بات چیت کرنی چاہیے، آئیے اس کے لیے دعا کریں”۔

87 سالہ فرانسس، جو نقل و حرکت کے مسائل کا شکار ہیں اور حالیہ ہفتوں میں نزلہ زکام اور برونکائٹس کے مرض میں مبتلا ہیں، نے ایک بار پھر سامعین کے لیے اپنی پہلے سے تیار کردہ بیشتر تحریریں پڑھنا چھوڑ دی ہیں۔انہوں نے یہ کام ایک معاون کو سونپ دیا ہے۔

اس ماہ کے شروع میں، فرانسس نے سوئس براڈکاسٹر آر ایس آئی کے ساتھ ایک انٹرویو میں یہ تجویز دے کر تنازعہ کھڑا کر دیا تھا کہ یوکرین کو "سفید جھنڈے کا حوصلہ دکھانا چاہیے” اور روس کے ساتھ کھلی بات چیت کرنی چاہیے۔ ان کے نائب، کارڈینل پیٹرو پیرولین نے بعد میں واضح کیا کہ روس کو پہلے اپنی جارحیت کو روکنا چاہیے۔