عمران خان کے خلاف اسلام آباد میں درج تین مقدمات میں ضمانت کی درخواست پر ریکارڈ طلب

چیئرمین پی ٹی آئی کیخلاف تھانہ کھنہ میں دو اور ایک تھانہ بارہ کہو میں درج مقدمات میں ضمانت کی درخواستوں پر انسداد دہشتگردی عدالت اسلام نے چوبیس اکتوبر کو تینوں مقدمات کا ریکارڈ طلب کر لیا۔

انسداد دہشت گردی کے جج ابولحسنات ذوالقرنین نے چئیرمین پی ٹی آئی کی تھانہ کھنہ میں دو اور تھانہ بارہ کہو میں درج مقدمات میں ضمانت کے معاملے پر سماعت کی دوران سماعت بیرسٹر سلمان صفدر نےچیئرمین پی ٹی آئی کی پروڈکش آرڈر جاری کرنے کی استدعا کرتے ہوئے دلائل دیے کہ اسلام آباد ہائی کورٹ نے ضمانت کی درخواستیں بحال کی ہیں اس کیس میں ملزم کی پروڈکشن لازمی ہے، آپ یہ بات نہ سوچیں کہ آپ کے پاس آفیشل سیکرٹ ایکٹ کی خصوصی عدالت کا اختیار بھی ہے جب ضمانت دائر ہو جاتی ہے تو میرٹ پر طے ہوتی ہے۔

اس دوران پراسکیوٹر راجا نوید نے دلائل دیتے ہوئے کہا کہ پراسکیوشن آج کہہ رہی ہے کہ چئیرمین پی ٹی آئی کو سکیورٹی خدشات ہیں۔عدالت نے پراسکیوٹر سے استفسار کیا کہ کیسسز کا ریکارڈ کہاں ہے؟  پراسکیوٹر نے بتایا کہ آج ریکارڈ نہیں ہے ریکارڈ پیش کریں گے۔

جج نے ریمارکس دیے کہ اگر چیرمین پی ٹی آئی کی موجودگی کا مسئلہ ہے تو کل جہاں ہم نے جانا ہے وہیں درخواست ضمانت سن لیں گے، آپ کو ہر ریلیف ملے گا جو آپ کا حق ہو گا،  سلمان بھائی آپ بہت بڑے چیمبر سے ہیں بغیر کسی تفریق کے کیس چلے گا۔

عدالت نے ریمارکس دیتے ہوئے تینوں مقدمات کا ریکارڈ طلب کیا کیس کی مزید سماعت چوبیس اکتوبر تک ملتوی کر دی گئی۔