سالک اور شافع پہلے گجرات کے عوام کا مینڈیٹ واپس کریں، پھر بات کرنے کا سوچیں گے، پرویز الٰہی

پی ٹی آئی کے صدر اور سابق وزیراعلیٰ پنجاب چوہدری پرویزالٰہی نے کہا ہے کہ سالک اور شافع پہلے گجرات کے عوام کا مینڈیٹ واپس کریں پھر بات کرنے کا سوچیں گے۔

عدالت میں پیشی کے موقع پر  صحافیوں سے غیر رسمی گفتگو میں پرویز الٰہی نے کہا کہ  لاڈلوں نے راتوں رات پی ٹی آئی  کا مینڈیٹ چوری کر لیا۔۔۔ سالک اور شافع پہلے گجرات کے عوام کا مینڈیٹ واپس کریں پھر بات کرنے کا سوچیں گے۔۔ گجرات، منڈی بہاؤالدین، تلہ گنگ کا مینڈیٹ چوری کرنے والے اپنے کیفر کردار کو پہنچنے والے ہیں،،اصل مینڈیٹ چوری کرنے والا محسن نقوی اور اس کی پولیس پارٹی ہے۔ایسے کیئر ٹیکر کی اب انشاء اللہ باری آنے والی ہے۔

پرویز الٰہی نے کہا کہ پاکستانی عوام نے عمران خان  سے محبت کا ثبوت ووٹ کی صورت میں دیا، عمران خان عوام کے دلوں میں بستا ہے۔ عوام ایسی حکومت کو قبول نہیں کریں گے جسے ان کی حمایت حاصل نہ ہو۔انشاء اللہ عوامی مینڈیٹ کے تحفظ کیلئے ہر جنگ لڑیں گے۔

پرویز الٰہی نے کہا کہ پاکستانی عوام نے ہمیں مایوس نہیں کیا، عوام بھی مایوس نہ ہوں۔انشاء اللہ ان ووٹ چوروں کو منہ کی کھانا پڑے گی۔ ہم کوئی آئی ایم ایف کے ذمہ دار نہیں، یہ جانیں اور لاڈلے جانیں۔مرکز اور پنجاب میں پی ٹی آئی کے ووٹ چوری کرنے والے ملک کو معاشی بحران سے نہیں نکال سکتے۔ عوام نے لاڈلوں کو مسترد کر دیا پھر یہ کس منہ سے عوامی مفاد کی بات کرتے ہیں۔

سابق وزیراعلیٰ نے کہا کہ مینڈیٹ چور ملکی مفاد میں نہیں بلکہ اپنے مفاد کی خاطر اقتدار حاصل کرنا چاہتے ہیں۔۔الیکشن مہم میں ایک دوسرے کے خلاف بولنے والے الیکشن کے بعد ایک بار پھر ملک لوٹنے کیلئے ایک ہو گئے ہیں۔