صنم جاوید نے نامناسب الفاظ استعمال نہ کرنے کی یقین دہانی کرادی

اسلام آباد ہائیکورٹ نے صنم جاوید کی گرفتاری غیرقانونی قرار دے کر رہائی کی درخواست نمٹا دی،وکیل نے صنم جاوید کی جانب سے نامناسب الفاظ استعمال نہ کرنے کی یقین دہانی کرادی۔

جسٹس میاں گل حسن اورنگزیب نے صنم جاوید کے والد جاوید اقبال خان کی درخواست پر سماعت کی،اٹارنی جنرل آف پاکستان عدالت پیش ہوئے اور موقف اختیار کیا کہ صنم جاوید کو مزید کسی مقدمہ میں گرفتار نہیں کیاجائے گا، بلوچستان پولیس راہداری ریمانڈ کی استدعا پریس نہیں کر رہی، صنم جاوید اب آزاد ہیں اپنے صوبے میں جا سکتی ہیں۔

جسٹس میاں گل حسن اورنگزیب نےریمارکس دیے کہ میں نے انٹرنیٹ پر دیکھا کہ صنم جاوید بہت نامناسب زبان استعمال کرتی ہے، جسٹس حسن اورنگزیب نے وکیل سے استفسار کیاکہ آپ گارنٹی دیتے ہیں کہ صنم جاوید مزید نامناسب گفتگو نہیں کرے گی؟

صنم جاوید کے وکیل میاں علی اشفاق ایڈووکیٹ نے یقین دہانی کرائی کہ صنم جاوید آئندہ نامناسب الفاظ استعمال نہیں کرے گی،عدالت نے صنم جاوید کی گرفتاری کو غیر قانونی قرار دیتے ہوئے بازیابی کیلئے دائر درخواست نمٹا دی۔