ڈپلومیٹک پاسپورٹ کیس میں سردار تنویر الیاس کی ضمانت منظور

آزاد کشمیر کے سابق وزیر اعظم سردار تنویر الیاس کے خلاف ڈپلومیٹک پاسپورٹ استعمال رنے کے مقدمے میں ڈسٹرکٹ اینڈ سیشنز کورٹ نے ان کی ضمانت کی درخواست منظور کرتے ہوئے ان کی رہائی کا حکم دے دیا ہے۔

اسلام آباد کی ڈسٹرکٹ عدالت کے جوڈیشل مجسٹریٹ عباس شاہ نے ایک لاکھ روپے کے مچلکوں کے عوض ضمانت منظور کرتے ہوئے سردار تنویر الیاس کو رہا کرنے کا حکم دیا۔

مقدمے کی سماعت کے دوران سردار تنویر الیاس کے وکیل نے دلائل دیتے ہوئے کہا کہ ان کے مؤکل کے خلاف درج دفعات کے تحت زیادہ سے زیادہ سزا تین سال ہے اور ملزم کو ضمانت ملنی چاہیے، وکیل سردار تنویر الیاس کا کہنا تھا کہ پاسپورٹ بھی واپس کر دیا گیا ہے۔

تاہم مقدمے کی سماعت کے دوران ایف آئی اے حکام نے ریکارڈ عدالت پیش کرتے ہوئے ایف آئی اے پراسیکیوٹر نے سردار تنویر الیاس کی ضمانت کی مخالفت کی۔

یاد رہے کہ سردار تنویر الیاس جوڈیشل ریمانڈ پر اڈیالہ جیل میں ہیں۔