حرمین شریفین کے انتظام کے لیے شاہ سلمان کی نگرانی میں نئی کونسل قائم

سعودی عرب کی کابینہ نے اسلام کی دو مقدس ترین مساجد میں مذہبی امور کی نگرانی کے لیے ایک نئی ایجنسی کے قیام پراتفاق کیا ہے۔

سعودی پریس ایجنسی کے مطابق یہ ایجنسی مکہ مکرمہ میں المسجد الحرام اور مدینہ منورہ میں مسجد نبوی کے مذہبی امور کی صدارت کہلائے گی۔ یہ ایجنسی دونوں مساجد میں ائمہ اور مؤذنین کی نگرانی کرے گی۔نیز مذہبی امور کے علاوہ وہاں پیش کیے جانے والے مذہبی اسباق اور سیمینارز کی نگرانی کی ذمہ داریاں سنبھالے گی۔اس وقت ان کی نگرانی کی ذمے دار صدارتِ عامہ برائے الحرمین الشریفین ہے جو سعودی حکومت کی نگرانی میں کام کرتی ہے۔

کابینہ نے صدارتِ عامہ برائے الحرمین الشریفین (جنرل پریزیڈنسی) کا نام تبدیل کرکے جنرل اتھارٹی برائے المسجد الحرام اور مسجد نبوی رکھنے کا بھی فیصلہ کیا ہے۔

نام کی تبدیلی کے بعد یہ نئی ایجنسی مالی اور انتظامی طور پر آزاد ہوگی اور انتظامی طور پر سعودی عرب کے بادشاہ کو جوابدہ ہوگی۔

یہ دونوں مقدس مساجد میں خدمات ، آپریشنز ، تعمیر ومرمت اور ترقیاتی کاموں کا انتظام سنبھالے گی۔اس کا ایک انتظامی بورڈ ہوگا جس کے سربراہ اور ارکان کا تقرر شاہی فرمان کے ذریعے کیا جائے گا۔