مستونگ اور ہنگو میں دہشتگرد حملوں پر سلامتی کونسل کی مذمت

اقوام متحدہ کی سلامتی کونسل نے پاکستان کے شہروں مستونگ اور ہنگو میں دہشت گرد حملوں کی مذمت کی ہے اور اقوام عالم پر زور دیا ہے کہ دہشتگردی کے خاتمے کے لیے پاکستان کے ساتھ تعاون کیا جائے۔

سلامتی کونسل ارکان نے متاثرین کے اہل خانہ اور حکومت پاکستان سے گہری ہمدردی اورتعزیت کا اظہار کیا ہے۔

سلامتی کونسل نے کہا کہ پاکستان میں ہونے والے گھناؤنے اور بزدلانہ خودکش حملے قابل مذمت ہیں۔

سلامتی کونسل نے کہا کہ دہشت گردی عالمی امن کیلئے سب سے سنگین خطرات میں سے ایک ہے، دہشت گردی کے مرتکب افراد،منتظمین،اسپانسرز کو انصاف کےکٹہرے میں لایا جائے۔

سلامتی کونسل نے کہا کہ اقوام عالم حکومت پاکستان اور دیگر تمام متعلقہ حکام کے ساتھ فعال تعاون کریں، دہشت گردی کی کوئی بھی کارروائی مجرمانہ اور بلاجواز ہے۔