کراچی میں شدید گرمی کی لہر کی پیشگوئی، درجہ حرارت 40 تک پہنچ سکتا ہے، محکمہ موسمیات

محکمہ موسمیات نے کراچی میں گرم و خشک موسم کے سبب گرمی کی شدید لہر کی پیش گوئی کردی،درجہ حرارت 40 ڈگری تک تجاوز کرسکتا ہے،سمندری ہوائیں بند ہونے سبب لو کے تھپیڑے چل سکتے ہیں۔

محکمہ موسمیات ارلی وارننگ سینٹر نے کراچی سمیت دیہی سندھ کے اضلاع میں غیرمعمولی گرمی کی پیش گوئی کردی،اگلے 3 سے 4 روز کے دوران گرمی کا پارہ 40 ڈگری تک تجاوز کرسکتا ہے۔

ہفتے کو پارہ مزید ایک ڈگری اضافے سے 41 ڈگری سینٹی گریڈ ریکارڈ ہوسکتا ہے،گرمی کی لہر کے دوران دوپہر کے وقت سمندری ہوائیں مختصر وقت کے لیے معطل رہ سکتی ہیں،اس دوران کراچی میں گرم ریگستانی بلوچستان کی شمال مغربی ہوائیں چلنے کی توقع ہے۔

شام کے اوقات میں سمندری ہوائیں بحال ہونے کا امکان ہے،جنوبی سندھ میں موسم گرم/ انتہائی گرم اور خشک رہنے کا امکان ہے،حیدرآباد،ٹھٹھ،سجاول بدین،عمرکوٹ اور تھرپارکرمیں بھی گرمی کا پارہ 40 ڈگری سے تجاوز کرسکتا ہے۔