شاہ محمود قریشی فیملی کے کاغذات نامزدگی کے تجویز کنندگان کو اغوا کر لیا گیا، پی ٹی آئی

پاکستان تحریک انصاف (پی ٹی آئی) نے دعویٰ کیا ہے کہ شاہ محمود قریشی، ان کے بیٹے زین قریشی اور بیٹی مہر بانو قریشی کے تجویز کنندگان اور حامیوں کو اغوا کرلیا گیا ہے۔

پی ٹی آئی کے آفیشل ”ایکس“ اکاؤنٹ سے ایک ویڈیو پوسٹ کی گئی جس میں کچھ افراد کو سرمئی رنگ کی سوزوکی کلٹس کار میں بیٹھتے اور فرار ہوتے دیکھا جاسکتا ہے۔

اس ویڈیو کے حوالے سے پی ٹی آئی نے دعویٰ کیا کہ ’شاہ محمود قریشی، زین قریشی اور مہر بانو قریشی کے تجویز کنندگان اور حامیوں کو اغوا کر کے بغیر نمبر پلیٹ گاڑی میں ڈالا جا رہا ہے‘۔

Proposers and seconders of Shah Mehmood Qureshi, Zain Qureshi and Meherbano Qureshi being abducted and put in car without number plate. pic.twitter.com/fcwZ9diOVs

— PTI (@PTIofficial) December 30, 2023

پی ٹی آئی کے وائس چیئرمین شاہ محمود قریشی ، ان کے بیٹے زین قریشی اور بیٹی مہر بانو قریشی کے کاغذات نامزدگی پر اعتراض عائد کیا گیا ہے۔

ہفتہ کو مقابل امیدور چوہدری وحید آرائیں نے ملتان کے قومی اسمبلی کے حلقہ این اے 150 سے شاہ محمود قریشی ، زین قریشی اور مہربانو قریشی کے کاغذات نامزدگی کے خلاف اعتراض جمع کرایا۔

چوہدری وحید آرائیں کے مطابق شاہ محمود قریشی نے اسٹامپ پیپر جعلی جمع کروائے اور اسلام آباد کا اسٹامپ پیپر ملتان جمع کروایا، شاہ محمود قریشی اور ان کے تائید کنندہ کے جعلی دستخط تھے۔

وحید آرائیں کا کہنا ہے کہ بڑے لوگ جو مرضی بلنڈر کریں ایسا نہیں ہے کہ ان کے خلاف کوئی نہیں جاسکتا، تینوں امیدواروں نے غلط دستاویزات جمع کروائے جس پر ہم نے تینوں امیدواروں کے کاغذات نامزدگی مسترد کرنے کی استدعا کی ہے۔