کورنگی میں ڈکیتی مزاحمت پر دکان مالک قتل، بیٹا زخمی، دو ڈاکو گرفتار

کورنگی میں ڈکیتی مزاحمت پر باپ قتل،بیٹا زخمی ہوگیا، فائرنگ کے تبادلے میں ملزمان بھی زخمی ہوئے جنہیں جناح اسپتال سے گرفتار کرلیا گیا۔

واقعہ کورنگی کوسٹ گارڈ چورنگی کے قریب پیش آیا جہاں مسلح ڈاکو گیس سلنڈر کی دوکان میں ڈکیتی کی نیت سے داخل ہوئے، مزاحمت پر ڈاکوؤں نے فائرنگ کردی جس کے نتیجے میں پچاس سالہ ظفر اقبال جاں بحق جبکہ اسکا بیس سالہ بیٹا وہاب زخمی ہوگیا۔

زخمی وہاب نے مبینہ طور پر ملزمان کا پستول چھین کر ان پر فائرنگ کی جس سے دونوں ملزمان بھی زخمی ہوگئے، پولیس نے موقع پر پہنچ کر لاش اور زخمی شہری کو اسپتال منتقل کیا جہاں دونوں زخمی ملزمان بھی علاج کی غرض سے موجود تھے جنہیں گرفتار کرلیا گیا ۔۔